काठमाडौं । चिनियाँ सेनाको कारबाहीमा परेर २० भारतीय सैनिक मारिएका छन् । भारत सरकारलाई श्रोत मान्दै भारतीय सञ्चारमाध्यमहरुमा आएको खबर अनुसार मर्नेहरुको संख्या ३ होईन २० रहेको छ ।
भारत र चीनको सीमामा भएको झडपमा भारतीय सेनाका कमान्डिङ अफिसर समेत २० जना भारतीय सैनिकको मृत्यु भएको भारतीय सञ्चारमाध्यमले जनाएका छन् । लद्दाखको १४ हजार फिट उचाइँमा रहेको गालवन भ्यालीमा यो झडप भएको हो ।
चीनले आधिकारीक जानकारी नदिएको भए पनि भारतीय मिडियाले ४३ चिनियाँ सैनिकलाई भौतिक रुपमा क्षति पुर्याएको बताएका छन् । मृतक भारतीय सैनिकहरुको संख्या थप बढ्ने अनुमान गरिएको छ । यो क्षेत्रमा पछिल्लो ४१ दिनदेखि तनाव रहेको छ । तनावलाई कम गर्नका लागि छलफल भइरहँदा १५ जुन साँझदेखि थप तनाव सिर्जना भएको थियो ।
त्यसपछि भएको झडपमा भारतीय सेनाका कर्णेलसहित २० जना सैनिकको मृत्यु भएको छ । ज्यान गुमाउनेमा १६ बिहार रेजिमेन्टका कमान्डिङ अफिसर कर्णेल सन्तोष बाबू, हवलदार पालानी र सिपाही कुन्दन झा सामेल छन् । अन्यको नाम सार्वजनिक भएको छैन ।
