महेन्द्रनगर : कञ्चनपुरको लालझाडी गाउँपालिकाको स्वास्थ्य चौकीमा कार्यरत स्वास्थ्यकर्मीले एउटै पीपीइ सेट १२ दिनसम्म धोएर लगाएको बताए।
गत चैत्र अन्तिम सातादेखि गाउँपालिकाको क्वारेन्टाइनमा स्वाब संकलनमा खटिएका ती स्वास्थ्यकर्मीलाई गत ३१ गते कोरोना संक्रमणको पुष्टि भयो । जेठ २२ गते कोरोना परीक्षणका लागि आफ्नो स्वाब लिइ सेती प्रादेशिक प्रयोगशाला पठाउँदा कोरोना पोजिटिभ देखिएको ती स्वास्थ्यकर्मीले बताए ।
गाउँपालिकाको क्वारेन्टाइनमा स्वाब संकलनका लागि जाँदा पर्याप्त सुरक्षा सामग्री नहुँदा आफू संक्रमित हुन पुगेको स्वास्थ्यकर्मीको भनाइ छ । ‘क्वारेन्टाइनमा बसेकाको स्वाब संकलन गर्दागर्दै आफूलाई नै संक्रमण भयो, उनले भने,’सुरुमा पीपीई अभावका कारण एउटै पीपीइ सेट घरमा लगेर १२ दिनसम्म धोएर लगाए ।’
यसअघि कञ्चनपुरको पुर्नबास नगरपालिकामा दुईजना स्वास्थ्यकर्मीमा समेत कोरोना संक्रमण देखिएको थियो । पूर्नवास नगरपालिकामा कार्यतर स्वास्थ्यकर्मी जनक धामी भने कोरोनालाई परास्त गरेर घर फर्किसकेका छन् ।
