काठमाडौं । प्रधानमन्त्री केपी शर्मा ओलीले कोरोनालाई तातोपानी खाएर उडाइदिनुपर्ने बताएका छन् । राष्ट्रिय सभामा सम्बोधन गर्दै प्रधानमन्त्री ओलीले भने, “कोरोनालाई तातोपानी खाएर उडाइदिनुपर्छ ।”
यसैगरी , प्रधानमन्त्री केपी शर्मा ओलीले कोरोना भाइरसको संक्रमण रोकथाम तथा न्यूनिकरणका लागि भएको खर्च मागेकोमा असन्तुष्टि प्रकट गरेका छन् । बिहीवार राष्ट्रिय सभामा सम्बोधन गर्दै ओलीले सरकार काममा लागेको बेला कसैकसैलाई भने खर्चको हिसाब चाहिएको भन्दै रोष पोखेका हुन् ।
उनले भने,‘१० अर्ब १० अर्ब भन्ने हल्ला चल्यो । उक्त रकम केही निकायमा पठाइयो । मिडियामा हिसाब आइसकेको छ, मोटामोटी । त्यसको मसिनो गरी हिसाब आलेप, मलेप हुन्छन् । ती कुराका प्रतिवेदन संसदमा आउँछन् । रुजु, बेरुजु अनियमितता यी सबै कुरा आउँछन् । हरेक व्यक्तिलाई देशभर भएका खर्च ? यहाँ मान्छे काममा लागेका छन्, यहाँ कसैलाई खर्चको हिसाब चाहिएको छ । काममा ध्यान छैन, काम प्रतिको प्रशंसा छैन । हिसाबकिताब चाहिएको छ, खोइ पैसा भनिएको छ ।’
प्रधानमन्त्रीले सबै खर्चको विवरण संसदमा प्रस्तुत गर्ने जवाफ दिएका छन् । कोरोनाबाट मृत्यु हुनेको वास्तविक तथ्यांक सार्वजनिक भएन – प्रधानमन्त्री ओली
प्रधानमन्त्री केपी शर्मा ओलीले नेपालमा काोरोनाका कारण २० जनाको मृत्यु भएको सार्वजनिक गरिएपनि त्यो संख्या वास्तविक नभएको जनाएका छन् ।
बिहीवार राष्ट्रिय सभामा सम्बोधन गर्दै उनले नेपालमा कोरोनाका कारण करिब ३ जनाको मात्रै मृत्यु भएको हुन सक्ने बताउँदै सार्वजनिक तथ्यांक वास्तविक नभएको बताएका हुन् ।
स्वास्थ्य तथा जनसंख्या मन्त्रालयले बुधबारसम्म नेपालमा कोरोनाबाट २० जनाको मृत्यु भइसकेको तथ्यांक सार्वजनिक गरिसकेको छ । यद्यपी प्रधानमन्त्री ओलीले भने कोरोनाबाट मृत्यु हुनेको वास्तविक संख्या नभएको बताएका हुन् ।
‘कतिपयलाई यथार्थ भन्दा रुचिकर मान्नुभएको छैन । २० जनाको निधन भएको छ तर उनीहरूको कोरोनाकै कारण निधन भएको होइन । एकाध, दुई, तीन केस हुनसक्छ कोरोनाकै कारणले निधन भएको । उनीहरूको अन्य बिमारीको कारणले मृत्यु भएको हुनसक्छ तर कोरोनाले छोएको हुनसक्छ ।’ उनलेभने ।
कोरोना संक्रमण भएका व्यक्तिको जुनसुकै कारणले मृत्यु भएपनि कोरोनाकै कारण मान्ने विश्व स्वास्थ्य संगठनको मापदण्डका कारण मान्नुपरेको प्रधानमन्त्रीको भनाइ थियो ।
प्रधानमन्त्रीले नेपालमा कोरोनाबाट मृत्यु हुनेको संख्या न्यून रहेको बताए । उनले भने,’हाम्रो उपचार विधि र हाम्रो प्रतिरोध क्षमताको कारणले निधन हुनेको संख्या धेरै कम छ ।’
नेपालमा प्रति १० लाखमा ०.७ प्रतिशतको मात्रै मृत्यु भएको भन्दै प्रधानमन्त्रीले नेपाल कोरोना संक्रमण र मृत्युमा दक्षिण एसियामा भुटानभन्दा मात्रै पछि रहेको बताए ।
