काठमाण्डौ – देशका धेरै ठाउँमा गएरातिदेखि नै झरी परेको छ । सोमबार दिनभर झरी पर्ने जल तथा मौसम विज्ञान विभागले जनाएको छ । मनसुन सक्रिय भएसँगै लगातार पानी परेको छ ।
विभाग अन्तर्गतको बाढी पूर्वानुमान महाशाखाले प्रमुख नदीमा बहाव बढ्ने भएकाले सतर्कता अपनाउन आग्रह गरेको छ ।
आज काठमाण्डौ उपत्यका सहित देशका विभिन्न ठूला नदी र साना सहायक नदीहरुमा बहाव बढ्ने र केही साना नदीमा आकश्मिक बहाव हुनसक्ने भएकाले तटीय क्षेत्रका बासिन्दालाई सतर्कता अपनाउन महाशाखाले विशेष बुलेटिन निकालेर आग्रह गरेको हो ।
आज बागमती, नारायणी, पश्चिम राप्ती, बबईमा बहाब बढ्ने र केही साना नदीमा आकश्मिक बहाव हुन सक्ने उल्लेख छ । साथै काठमाण्डौ उपत्यकाका सहित सिन्धुपाल्चोक, काभ्रेपलान्चोक, मकवानपुर, सिन्धुली, नवलपरासी, रुपन्देही, कपिलबस्तु, दाङ, अर्घाखाँची, गुल्मी, पाल्पा, स्याङजा, बर्दिया र आसपास मध्यम तथा भारी वर्षा भैरहेको छ ।
काठमाण्डौ उपत्यका हुदै बहने वाग्मती र यसका सबै सहायक नदीमा बहाव बढ्दो छ । बालकुमारीमा जलसतह २ मिटर भन्दा धेरै बढेको छ । मनोहरा, हनुमन्ते लगायत केही साना नदीको पानी नदी किनारको सडक र बस्तीमा जान सक्ने भएकाले उच्च सतर्कता अपनाउन भनिएको छ ।
