काठमाडौं । पछिल्लो २४ घण्टामा नेपालका विभिन्न जिल्लामा गरी थप ४७६ जनामा कोरोना भाइरस (कोभिड १९) संक्रमण पुष्टि भएको छ ।
स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले आज (सोमबार) को प्रेस ब्रिफिङका क्रममा यसबारे जानकारी दिएका हुन् । आज थपिएका संक्रमितमध्ये भक्तपुरका १, काठमाडौंका ६ र ललितपुरका एक जना लगायत अन्य विभिन्न जिल्लाका रहेका छन् ।
प्रवक्ता डा. गौतमका अनुसार थप ४७६ जनामा संक्रमण पुष्टि भएसँगै कुल संक्रमितको संख्या १३ हजार २४८ पुगेको छ ।
संक्रमितमध्ये ३ हजार १३४ जना उपचारपछि निको भएर फर्किसकेका छन् । पछिल्लो २४ घण्टामा मात्रै १२१ जना संक्रमित डिस्चार्ज भएका छन् । १० हजार ८५ जना विभिन्न अस्पतालको आइसोलेसनमा उपचाररत छन् ।
साथै नेपालमा कोरोना संक्रमणबाट थप एकजनाको मृत्यु भएको छ ।
स्वास्थ्य तथा जनसंख्या मन्त्रालयका अनुसार स्टार अस्पतालमा उपचाररत रौतहटका ३० वर्षिय पुरुषको कारोनाका कारण मृत्यु भएको हो ।
ललितपुरको सानेपामा रहेको स्टार अस्पतालमा उपचाररत ती युवकको शनिबार मृत्यु भएको हो । मन्त्रालयका प्रवक्ता डा. जागेश्वर गौतमका अनुसार स्वासप्रस्वासमा समस्या आएपछि अस्पताल भर्ना भएका थिए । आइसीयुमा उपचाररत उनको १३ गते स्वाव संकलन गरी पाटन अस्पतालमा कोरोना परीक्षणका लागि पठाइएको थियो । १३ गते बेलुकी नै उनको निधन भएको थियो । उनको हिजोमात्रै कोरोनाको पोजेटिभ रिपोर्ट आएको थियो ।
तीन महिनादेखि फोक्सोमा समस्या आएका कारण विभिनन अस्पतालमा उनी उपचारका लागि गएको प्रवक्ता डा. गौतमले बताए । उनको श’व नेपाली सेनाले व्यवस्थापन गरेको छ । योसँगै नेपालमा कोरोनाबाट मृत्यु हुनेको संख्या २९ पुगेको छ ।
