काठमाडौं । दिनहुँजसो भीडभाड बढेपछि सरकारले लकडाउनमा कडाइ गर्ने तयारी गरेको छ । लकडाउन खुकुलो भएपश्चात् संक्रमणको जोखिम बढेको निष्कर्ष निकाल्दै सरकारले लकडाउनममा कडाइ गर्ने तयारी गरेको हो ।
आज (सोमबार) बसेको कोभिड–१९ संकट व्यवस्थापन केन्द्र (सिसिएमसी) को बैठकमा यसैबारे छलफल गरिएको छ । अहिलेको खुकुलो मोटालिटीलाई व्यवस्थि बनाउनेबारे छलफल भएको बताइएको छ ।
यद्यपी अहिले खुलेका व्यवसायहरु बन्द गरिने भन्दा पनि सुरक्षाका उपायहरु अपनाउन लगाइने जानकारी प्राप्त भएको छ । प्राप्त जानकारी अनुसार खुलेका व्यावसायिक स्थलमा प्रोटोकलको पालना नगरिएको अवस्थामा संक्रमण बढ्ने जोखिम छ ।
पसलहरुमा सामाजिक दुरी समेत कायम नगरिएको पाइएपछि निगरानी बढाउनबारे छलफल गरिएको हो । पछिल्लो समय लकडाउन खुकुलो भएदेखि बजारमा भिडभाड बढेको छ । मानिसहरु मास्क नलगाइ हिँड्डुल गर्न थालेका छन् । यसकारण जोखिम बढ्ने अनुमान गरिएको हो ।
स्वास्थ्य तथा जनसंख्या मन्त्रालयले पनि यसबारे सचेत गराइरहेको छ । मन्त्रालयका प्रवक्ता डा. जागेश्वर गौतमले काठमाडौं उपत्यका लगायत घनाबस्तीमा कोरोना संक्रमण बढ्न थालेकाले विना काम घरबाट बाहिर ननिस्किन स्वास्थ्य तथा जनसंख्या मन्त्रालयले आग्रह गरेका छन् ।
सोमबार स्वास्थ्य मन्त्रालयको नियमित पत्रकार सम्मेलनमा उनले यस्तो अनुरोध गरेका हुन् । दुई मिटरको दूरी कायम गर्न, मास्क प्रयोग गर्न, साबुन पानीले मिचिमिची हात धुन, अत्यावश्यक काम नपरी घरबाट ननिस्कन उनले अपिल समेत गरे ।
नेपालमा पछिल्लो २४ घण्टामा मात्रै ४७६ जना कोरोना संक्रमित फेला परेका छन् । थप एक जनाको मृत्यु भएको छ । नेपालमा हालसम्म कुल संक्रमितको संख्या १३ हजार २४८ पुगेको छ भने २९ जनाको मृत्यु भएको छ ।
