भक्तपुरमा मोटरसाइकल दुर्घटना, चालकको मृत्यु

राष्ट्रिय संचार

१ असार २०७७, सोमबार १२:०२ प्रकाशित

काठमान्डू,असार १। भक्तपुरमा मोटरसाइकल अनियन्त्रित भई नालीमा खस्दा चालकको मृत्यु भएको छ । आइतबार राति पौने ६ बजे भक्तपुर नगरपालिका-१० कमलविनायकस्थित बा ९५ प १४५५ नम्बरको मोटरसाइकल नालीमा खस्दा चालक १७ वर्षीय रञ्जित माहाजुको उपचारका क्रममा मृत्यु भएको छ।

उक्त मोटरसाइकल खरिपाटीबाट कमलविनायकतर्फ जाँदै गरेको बेला आफैं अनियन्त्रित भई नालीमा खसेको महानगरीय प्रहरी परिसर भक्तपुरका डिएसपी दीपक गिरीले जानकारी दिए। दुर्घटना हुँदा माहाजुको उपचारका लागि प्रहरीले भक्तपुर अस्पताल पुर्‍याएको थियो। साथै, त्यहाँ प्राथमिक उपचारपछि थप उपचारको लागि सवा ६ बजे ट्रमा सेन्टर ‘रिफर’ गरिएको थियो । त्यहाँ करिब राति सवा १० बजे उपचारका क्रममा चिकित्सकले मृत घोषणा गरेका थिए।घटनाबारे प्रहरीले थप अनुसन्धान गरिरहेको छ।