सुर्खेत ७, असोज। वीरेन्द्रनगर नगरपालिका–१ को वडा कार्यालयमा पेट्रोल छर्केर आगो लगाउने युवालाई प्रहरीले अझै पक्राउ गर्न सकेको छैन । बुधबार बिहान सोही वडाका बास्तम लामिछाने भन्ने व्यक्तिले वडा अध्यक्ष गंगाराम सुनारलाई ज्यान मार्ने धम्की दिँदै वडा कार्यालयमा आगजनी गरेका थिए ।
आगजनी गर्नुअघि वडाअध्यक्ष सुनारलाई ती युवकले वडा कार्यालयकै फोन नम्बरबाट फोन गरी धम्की समेत दिएका थिए । त्यसको केही समयमा नै उनले वडा कार्यालयमा आगजनी गरेका हुन् ।
आगजनीबाट वडाअध्यक्षको कार्यकक्षमा पूर्ण क्षति पुगेको छ भने अध्यक्ष बस्ने कुर्सी, सोफा, दराज त्यहाँ रहेका सम्पूर्ण कागजात जलेर नष्ट भएको छ । घटनास्थलमा प्रहरी नपुग्दै लामिछाने फरार भइसकेका थिए । घटनाको छानविन गरी दोषीलाई कारबाही गर्न माग गर्दै वडा कार्यालयले लामिछानेको नाममा जिल्ला प्रहरी कार्यालयमा किटानी जाहेरी दर्ता समेत गरेको छ । तर, ती युवकलाई प्रहरीले अझै नियन्त्रणमा लिन सकेको छैन ।
यता जिल्ला प्रहरी कार्यालय सुर्खेतका प्रहरी प्रमुख एवम् प्रहरी उपरीक्षक पदमबहादुर विष्टले वडाअध्यक्षलाई मार्ने धम्की दिएर वडा कार्यालय आगजनी गर्ने युवकलाई अझै पक्राउ गर्न नसकिएको बताउनु भयको छ । उहाले आगजनी गरेलगत्तै पश्चिम क्षेत्रमा रहेको जंगलतिर पसेकाले खोज अनुसन्धान भइरहेको छ, उहाले भन्नुभयो,‘ति युवालाई केही दिन अघिमात्रै हामीले जेलमुक्त गरेका थियौँ । बास्तमको यसअघिको क्रियाकलाप पनि गतिलो छैन् । यसअघि काठमाडौँमा समेत विभिन्न अपराध गरेको कारण पक्राउ गरिएको थियो ।
प्रहरी उपरीक्षक विष्ट भन्नुहुन्छ – ति युवा मानसिक रुपमा तन्दुरुस्त देखिँदैनन् । वडा कार्यालयमा आगजनी गर्नुपूर्व पेट्रोल हाल्नका लागि त्यहीकै कर्मचारीसँग बोतल मागेका रहेछन् । त्यसपछि उनले पेट्रोल छर्केर आगजनी गरेको भेटियो । प्रहरीका अनुसार लामिछानेले यसअघि पनि वडाअध्यक्षलाई धम्की दिएका रहेछन, प्रहरी उपरीक्षक विष्टले भन्नुभयो।
