असोज १२, दमौली । नेपाली कांग्रेसको स्थानीय तहको अधिवेशनमा तनहुँ जिल्लामा केन्द्रीय नेताहरूको प्रभाव देखिएको छ । नेता रामचन्द्र पौडेल, केन्द्रीय सदस्य शंकर भण्डारी, गोविन्द भट्टराई, ध्रुब वाग्ले, प्रदीप पौडेलको अधिवेशनमा प्रभाव देखिएको छ । रामचन्द्र पौडेल आफ्नै गृहजिल्ला तनहुँमा कमजोर देखिन थालेका छन् । पौडेल दुई वटा पालिकामा सीमित भएका छन्।
व्यास नगरपालिकाको सभापतिमा सूर्यचन्द्र हड्ख विजयी भएका छन् । उनी पौडेल निकट मानिन्छन् । भानु नगरपालिका कार्यसमितिको सभापतिमा रामकुमार श्रेष्ठ विजयी भएका छन् । श्रेष्ठ पनि पौडेल निकटका मानिन्छन् ।
शुक्लागण्डकी नगरपालिकामा गोपीबहादुर गुरुङ विजयी भएका छन् । उनी केन्द्रीय सदस्य प्रदीप पौडेल निकट हुन् । प्रदीप पौडेल निकट यम थापा घिरिङ गाउँपालि समितिको सभापति बनेका छन् ।
आँबुखैरेनी गाउँपालिका कार्यसमितिको सभापतिमा विष्णु पन्त विजयी भएका छन् । बन्दीपुरमा कर्णबहादुर खत्री विजयी भएका छन् । दुवै जना केन्द्रीय सदस्य शंकर भण्डारी निकटका हुन् ।
माग्दे गाउँपालिका कार्यसमितिको सभापतिमा रामभक्त घिमिरे विजयी भएका छन् । घिमिरे कांग्रेसको केन्द्रीय आमन्त्रित सदस्य ध्रुब वाग्ले निकटका मानिन्छन् ।नेता पौडेलले पूर्वसह–महामन्त्री गोविन्दराज जोशीलाई कारबाही गरेर पार्टीबाट निस्काषित गरेपछि त्यसको प्रभाव वडा र नगर गाउँ अधिवेशनमा देखिएको छ ।
कांग्रेसको केन्द्रको राजनीतिमा अबरोध गरेर लफडा गर्दै आएका पौडेल आफ्नै गृहजिल्लामा नराम्रोसँग एक्लिएका छन् । पौडेलविरुद्ध अन्य नेताहरू एक भएर अगाडि बढ्ने संकेत पालिका अधिवेशनमा देखियको छ।
