काठमाडौँ । नेपाल कम्युनिस्ट पार्टीका महासचिव नेत्रविक्रम चन्द ‘विप्लव’ले प्रधानमन्त्री शेरबहादुर देउवालाई ज्ञापनपत्र बुझाउँदै सरकारसँग भएको ३ बुँदे सहमति कार्यान्वयन गर्न खबरदारी गरेका छन् ।
सहमति कार्यान्वयन नगरी तत्कालीन प्रधानमन्त्री केपी शर्मा ओली नेतृत्वको सरकार बिदा भएको र वर्तमान सरकारलाई समेत सहमतिबारे स्मरण गराएको विप्लवले ज्ञापनपत्रमा उल्लेख गरेका छन् ।
आगामी असोज २१ गते नेपाल सरकार र नेपाल कम्युनिस्ट पार्टीबीच ३ बुँदे सहमति भएको ६ महिना पुग्ने विप्लवले स्मरण गराएका छन् । वर्तमान सरकार गठन भएको पहिलो हप्तामै ३ बुँदे सहमति कार्यान्वयनको विषयलाई आफ्नै नेतृत्वमा प्रधानमन्त्रीसँग भेटवार्ता भएको समेत जानकारी गराएका छन् छ ।
‘आजका मितिसम्म बन्दी नेता कार्यकताहरू रिहा नहुनु र मुद्दा खारेज नहुनुले हाम्रो पार्टी, बन्दी नेता कार्यकर्ताहरू, उहाँका परिवारजन र नेपाली जनतामा आक्रोश र चिन्ता पैदा भएको छ । यो विषयलाई गम्भीरताका साथ लिन जरुरी छ,’ ज्ञापनपत्रमा उल्लेख छ, ‘प्रधानमन्त्रीज्यू, ३ बुँदे सहमतिको शुरूमै कार्यान्वयन गर्नुपर्ने विषय बन्दीको रिहाइ र मुद्दाको खारेजी हो । यही विषय झन् बढी ढिला भइराखेको छ । हाम्रो पार्टी ३ बुँदे सहमतिप्रति पूर्ण प्रतिबद्धतासहित अक्षरशः लागू गरिराखेको छ र गर्ने छ । आशंका, अविश्वास, मनोवैज्ञानिक दबाब र ढिलासुस्तीको कुनै गुञ्जायस छैन । यो राष्ट्रिय राजनीतिक मुद्दा हो । यसर्थ विषयको गम्भीरता र संवेदनशिलतालाई दृष्टिगत गरी बन्दी रिहा र मुद्दा खारेज गर्नका निम्ति एक विशेष कार्यदल बनाएर कार्यसम्पादन गरी विषयको छिटोभन्दा छिटो निरूपणको अपेक्षा गर्दछौं ।’
सरकारले गरेको सहमतिको ५ महिना समय व्यतित हुँदासम्म लागू नगरी ओली सरकार विघटन हुनु राष्ट्रिय राजनीति, नेपालको राजनीतिक आन्दोलन र नेपाली जनताको निम्ति धोका जस्तो विडम्बनापूर्ण कुरा रहेको ज्ञापनपत्रमा उल्लेख छ ।
‘वार्ता र ३ बुँदे सहमतिले राष्ट्रिय र अन्तर्राष्ट्रिय जगतमा पारेको सकारात्मक प्रभाव र जनअपेक्षामाथि तुषारापात जस्तो भएको छ । यो हाम्रो पार्टीले आफ्नो स्थापनाकालदेखि अगाडि सारेको र अविराम संघर्ष गर्दै आएको देशको राष्ट्रिय स्वाधिनता र विद्यमान राजनीतिक, आर्थिक, सामाजिक, सांस्कृतिक, विकास, समृद्धि र जनताको विकराल जनजीविका लगायत यावत समस्याहरूको शान्तिपूर्ण ढंगले वार्ता र संवादको माध्यमवाट अग्रगामी र क्रान्तिकारी समाधान खोज्ने ३ बुँदे सहमतिको मर्म, पार्टीको तत्परता र नेपाली जनताको चाहनाका खिलापमा छ । यसले समस्याको समाधान होइन, झन् जटिल स्थितिको सिर्जना गर्नेछ । यस्तो व्यवहारले नेपाली जनतालाई निराश बनाउँदै गइरहेको छ,’ ज्ञापनपत्रमा उल्लेख गरियको छ ।
