सुर्खेत । काँक्रेविहार संरक्षित वन क्षेत्रको ‘कम्पाउण्ड वाल’ (पर्खाल) साँध सीमामै लगाउनुपर्ने भन्दै उच्च अदालत सुर्खेतमा रिट निवेदन दर्ता भएको छ । सो क्षेत्रको जग्गा मासिने गरी जग्गा बाहिर छोडेर साँध सीमाभन्दा भित्र पर्खाल निर्माण गरेको समाचार प्रकाशन भएपछि अधिवक्ता शेरबहादुर खत्रीले रिट निवेदन दायर गरेका छन् ।
‘काँक्रेविहार संरक्षित वन क्षेत्रको बाहिरी साँध सिमा नापनक्सा भई साँध सीमा क्षेत्रमा पिलर समेत गाडिसकेको हुँदा सोही साँध सीमाबाट कम्पाउण्ड वाल (पर्खाल) लगाई निर्माण कार्य गर्नु गराउनु’ भन्ने रिट निवेदनमा आदेश माग गरिएको छ ।
साथै, रिट निवेदनमा ‘साविकको साँध सीमाभन्दा झण्डै ५/७ मिटर जग्गा बाहिर जमिन छोडि काँक्रेविहार संरक्षण क्षेत्रको ५-७ मिटर भित्रबाट पर्खाल निर्माण कार्य नगर्नु, नगराउनु’ भनि अन्तरिम आदेशको माग गरिएको अधिवक्ता खत्रीले जानकारी दिएका छन् ।
उनका अनुसार भोलि पहिलो सुनुवाइ हुँदैछ । सुर्खेतमा रहेर पछिल्लो समय सार्वजनिक चासोका विषयमा रिट निवेदन दायर गर्दै आएका अधिवक्ता खत्रीले यसपटक काँक्रेविहार संरक्षित वन क्षेत्रका सम्बन्धमा रिट निवेदन दायर गरेका छन् ।
