सुर्खेत । दशैं तिहार लगायतका चाडपर्वलाई लक्षित गरेर बजार अनुगमन लाइ अगाडी बढाएको छ । स्थानीय प्रशासनले चाडपर्वमा बढी सामानको माग र खपत हुने भहेकोले बजारमा खाद्य वस्तुको कृत्रिम अभाव सिर्जना गरेर मूल्य बढाउने, गुणस्तरहीन वा म्याद नाघेका सामान बिक्री गर्ने र नापतौलमा ठगी गर्नेजस्ता समस्या नहोस् भनेर बजार अनुगमनलाई तीव्रता दिएको हो ।
जिल्ला प्रशासन कार्यालयले जिल्लाभरी चाडपर्व लक्षित बजार अनुगमनलाई शुरू गरेको बताएको छ । खाद्य प्रविधि तथा गुण नियन्त्रण डिभिजन कार्यालय सुर्खेतका प्रमुख भेषबहादुर थापाले नियमित बजार अनुगमन गर्ने गरेपनि चाडपर्वमा जिल्ला प्रशासनको नेतृत्वमा संयुक्त रुपमा बजार अनुगमन गर्ने गरिएको बताएका छन् ।
‘जिल्ला प्रशासन कार्यालयको नेतृत्वमा खाद्य, प्रविधि तथा गुण नियन्त्रण डिभिजन, नेपाल नापतौल तथा गुणस्तर कार्यालय, जिल्ला प्रहरी कार्यालय, राष्ट्रिय उपभोक्ता मञ्च, सुर्खेत उद्योग वाणिज्य संघसहितको संयुक्त अनुगमन टोलीले नियमित रुपमा बजार अनुगमन गरिरहेको छ,’ उनले भने, ‘चाडपर्वमा सामानको माग र कारोबार पनि बढी हुने भएकाले मूल्य, सामानको गुणस्तरमा उपभोक्ता ठगीमा नपरुन् भनेर अनुगमलाई तीव्र पारिएको हो ।’
बढी मात्रा मा खपत हुने खाद्यवस्तु, तरकारी, लत्ताकपडा, यातायातलगायतमा छुटाछुट्टै अनुगमन गर्ने गरि योजना बनाईएको उनको भनाइ रहेको छ । जिल्ला प्रशासनमा कुनैपनि उपभोक्तासँग जोडिएको उजुरी र गुनासो आउने बित्तिकै आकस्मिक अनुगमनमा जाने गरी तयारी अवस्थामा रहेको जिल्ला प्रशासन कार्यालय सूचना अधिकारी श्रीसम्शेर रानामगरले बताएक छन् । उनले चाडपर्व लक्षित बजार अनुगमनलाई तीव्रता दिनुका साथै शान्ति सुरक्षालाई चुस्त, दुरुस्त बनाईएको समेत बतायका छन् ।
