काठमाडौं । सत्तारुढ नेपाली कांग्रेसका युवा नेता गगनकुमार थापाले सरकारको कामकारबाहीप्रति असन्तुष्टि जनाएका छन् । पूर्वमन्त्री समेत रहेका उनले सरकारले आफ्नो काममा गति लिन नसकेको भन्दै असन्तुष्टि जनाएका हुन् ।
नेपाल विद्युत् प्राधिकरण कर्मचारी संघले शुक्रबार काठमाडौंमा आयोजना गरेको एक कार्यक्रममा बोल्दै नेता थापाले दुई छिमेकी मुलुक भारत र चीनबाट फाइदा लिने मौका नचुकाउन पनि सरकारको ध्यानाकर्षण गराएका छन् ।
‘यो सरकारले जुन गति लिनुपर्ने हो, त्यो गति हामीले लिन सकेका छैनौं । त्यसैले डर लागेको छ, नेपाली नागरिक भएर । जसरी हामीले २००७ सालपछिको समय खेर फाल्यौं । फेरि हामीले अब अर्को मौका खेर फाल्दै छौ कि भन्ने डर लाग्न थालेको छ,’ उनले भने ।
थापाले विद्युत खपत बढाउने विषयमा सोच्न पनि प्रधानमन्त्री शेरबहादुर देउवालाई आग्रह गरेका छन् । उनले विद्युत् खपत बढाउने बेला आएको र त्यसका लागि सरकारले योजनावद्ध सोच अगाडि ल्याउन ढिलाइ गर्न नहुने स्पष्ट समेत पारेका छन् ।
उनले विद्युत प्राधिकरणले आर्जन गरेको प्रतिष्ठा जोगाउने गरी काम गर्न कर्मचारीलाई आग्रह पनि गरेका छन् । उनले देशलाई बनाउने हो भने सबैले आ–आफ्नो ठाउँको जिम्मेवारी सफलतापूर्वक सम्पन्न गर्नुपर्नेमा जोड दिएका छन् ।
