मोरङ । प्रदेश १ का मुख्यमन्त्री भीम आचार्यले प्रदेश सभामा पेश गरेको विश्वासको मतको प्रस्तावको छिनोफानो कार्तिक १५ गते मात्रै हुने भएको छ।
विश्वासको मतको प्रस्तावमाथि आजै मत विभाजन हुने भनिएको थियो। तर प्रदेश सभा सचिवालयले सूचना टाँस गरेर बैठक कार्तिक १५ गतेसम्म स्थगित भएको जनाएको छ।
नेकपा एकीकृत समाजवादीका नेता राजेन्द्रकुमार राईले कांग्रेसको अपरिपक्क निर्णयमा एमालेले समय पाएको बताए। सभामुख प्रदीपकुमार भण्डारीले संविधानको विधि प्रक्रिया मिचेर एकपछि अर्को कदम चालेको उनले आरोप लगाए।
एमालेलाई साथ दिने गरी कांग्रेसले सदनलाई रोकेको बताएका नेता राईले आलोपालो सरकारका लागि वर्तमान सरकारलाई हटाएर छलफल गर्न सकिनेमा जोड दिए।
उनले भने, ‘कांग्रेससँग सरकार गठनका विषयमा छलफल हुन बाँकी नै छ। अहिलेको सरकार गिराएपछि आलोपालो नेतृत्व, मन्त्रालय बाँडफाडमा कुरा गर्न सकिन्थ्यो। तर कांग्रेसले अपरिपक्क निर्णय गरेको छ।’
सोही क्रममा जनता समाजवादी पार्टीका नेता जयराम यादवले कांग्रेसले आफ्नो स्थान छाड्दा सदनको कारबाही स्थगित भएको आरोप लगाए। यादवले कांग्रेसका केही सभा सदस्यहरुको हतारो निर्णयले प्रदेशलाई थप अन्योलमा पारेको बताए।
त्यसैगरि कांग्रेसका सचेतक सूयर्माराज राईले आलोपालो नेतृत्वबारे दलभित्र छलफल भइरहेको बताएका छन्। प्रदेश सभाका सचिव गोपाल पराजुलीका अनुसार आइतबार बस्ने भनिएको प्रदेश सभाको नवौँ तथा हिउँदे अधिवेशनको चौथो बैठक सोमबारसम्म सरेको जानकारी दिए।
यसअघि मुख्यमन्त्री भीम आचार्यले आज विश्वासको मत लिने कार्यसूची रहेको थियो।तर प्रमुख प्रतिपक्षी दल नेपाली कांग्रेसले कार्य व्यस्तता प्रस्तुत गर्दै सदनको कारबाही अघि नबढाउन सचिवालयमा निवेदन दिएको थियो।त्यसैगरि सत्तारुढ दल एमालेले पार्टीको जारी अधिवेशनलाई प्रस्तुत गर्दै सदनको कारबाही १५ गतेसम्मका लागि रोक्न सचिवालयमा निवेदन दर्ता गराएको थियो।
