काठमाडौं । केहीसमय अघि तास खेलेको भिडियो सार्वजनिक भएको सर्लाहीका प्रमुख जिल्ला अधिकारीसहित तीन सुरक्षा प्रमुखको जिम्मेवारी एकैसाथ खोसिएको छ।
सर्लाहीका प्रमुख जिल्ला अधिकारी रामकुमार महतो, प्रहरी उपरीक्षक सन्तोषसिंह राठौर र सशस्त्रका प्रहरी उपरीक्षक गंगाराम श्रेष्ठलाई जिम्मेवारीबाट हटाइएको हो।
राठौर जिल्ला प्रहरी कार्यालयका प्रमुख हुन्। त्यस्तै श्रेष्ठ सशस्त्र प्रहरी १० नम्बर गणका प्रमुख हुन्। उनीहरुको एकै साथ सरुवा भएको छ। गृह मन्त्रालयकाअनुसार महतो मन्त्रालय तानिएका छन्। सर्लाहीको प्रमुख जिल्ला अधिकारीको कार्यभार सम्हाल्न मन्त्रालयबाट बाबुराम खतिवडालाई पठाइएको छ।
नेपाल प्रहरी प्रधान कार्यालयले जिल्ला प्रहरी कार्यालय सर्लाहीमा प्रहरी उपरीक्षक राठौरको सट्टामा प्रदेश २ प्रहरी कार्यालय जनकपुरबाट कृष्ण प्रसाईलाई पठाएको छ भने सशस्त्र प्रहरी उपरीक्षक श्रेष्ठको ठाउँमा प्रहरी उपरीक्षक भरत खनियाँलाई पठाइएको छ ।
तीनै प्रमुखको एकैसाथ सरुवा हुनुले केही समयअघि सार्वजनिक भएको भएको भिडियोका कारण हुनसक्ने आँकलन गरिएको छ ।
