काठमाडौँ । सत्तारुढ दलको भातृ संगठन नेपाल विद्यार्थी संघले चाडपर्वको मुखमा सरकारले पेट्रोलियम पदार्थको मूल्यवृद्धि गरेको भन्दै खेद प्रकट गरेको छ । नेविसंघका अध्यक्ष राजिब ढुंगानाले आइतबार विज्ञप्तिमार्फत् पेट्रोलियम पदार्थमा गरिएको मूल्यवृद्धि तत्काल खारेज गर्न माग गारेका छन , अन्यथा कडा प्रतिवाद गर्ने चेतावनी समेत दिएका छन् ।
‘नेपाली जनताले उत्साह र श्रद्धाका साथ मनाउने विभिन्न चाडपर्वहरु नजिकिएको समयमा नेपाल आयल निगमद्वारा गरिएको पेट्रोलियम पदार्थको मूल्यवृद्धिप्रति हाम्रो गम्भीर रुपमा ध्यानाकर्षण भएको छ,’ ढुंगानाले भनेका छन्, ‘ढुवानी खर्च वृद्धि भई बजारमा उपभोग्य वस्तुको समेत मूल्यवृद्धि हुने अवस्था सिर्जना गर्ने गरी भएको पेट्रोलियम पदार्थको मूल्यवृद्धिको निर्णय प्रति खेद र भत्सर्ना व्यक्त गर्दछौं ।’
नेविसंघले कोभिड–१९ को प्रतिकुलता भोगिरहेका जनतालाई राहत हुने किसिमका कार्य गर्न सरकारसँग आग्रह गरेका छन् । ‘यो समय प्रतिकुलतामा बसिरहेका नेपाली जनतालाई राहत महसुस हुने गरी कार्य गर्ने समय हो । त्यसैले सरकारले हस्तक्षेप गरी तत्काल आयल निगमले गरेको मूल्यवृद्धि खारेज गर्न जोडदार माग गर्दछौं,’ नेविसंघ अध्यक्ष ढुंगानाले भनेका छन् ।
नेविसंघले नेपाल आयल निगम भित्रको वेथिति, अनियमितता र भ्रष्टाचारलाई छानविन र नियन्त्रण गर्दै, त्यहां विभिन्न नाममा संचित गरिएका मूल्य स्थिरीकरण कोष लगायतका विभिन्न कोषहरूको सदुपयोग गर्दै जनतालाई राहत दिन माग समेत गरेका छन् ।
