काठमाडौं । नेपाली कांग्रेसका नेता गगन थापाले आउँदो चुनावमा नेकपा एमालेलाई कुचो लगाएर बढारिने चेतावनी दिनुभएको छ ।
भक्तपुरको गुण्डुमा कांग्रेसले आयोजना गरेको कार्यक्रममा थापाले एमालेसँग एक्लै चुनाव लडेरै कांग्रेसले बहुमत ल्याउने दावी गर्दै आउँदो चुनावमा एमाले तेस्रो स्थानमा सीमित हुने घोषणा समेत गर्नुभयो ।
एक्लै चुनाव लड्न आउन एमाले अध्यक्ष केपी ओलीले दिएको चुनौतीको जवाफ दिँदै थापाले भन्नुभयो, ‘सिंगल–सिंगल चुनाव लड्न आउन भनेको होइन ? पहिले पनि सिंगल नै लडेर कांग्रेस सबैभन्दा ठूलो पार्टी भएको थियो । अब त झन् एमालेलाई कुचो लगाएर बढार्ने हो । कतै धुलो अड्केको रहेछ भने भ्याकुम लगाउने हो ।’
एमाले राजनीतिक पार्टी नभई ‘केपी ओलीको प्राइभेट लिमिटेड’ भएको आरोप लगाउँदै थापाले थप्पनुभयो, ‘एमालेमा फरक मत राख्ने भीम रावल र धनश्याम भुषाल रहेका छन् । उनीहरूको पनि त्यहाँ केही चल्दैन । एमाले पार्टी होइन ओली प्राइभेट लिमिटेड भइसकेको छ ।’
एमालेलाई केन्द्रदेखि स्थानीय तहसम्म निर्वाचनमा बढार्ने भन्दै थापाले भन्नुभयो, ‘पाँच वर्ष आरामले सरकार सञ्चालन गर्नुपर्नेमा राज्य अस्तव्यस्त बनाउने काम ओली सरकार बाट भयो । त्यसकारण एमालेले दण्ड पाउनैपर्छ । एमालेलाई माथिदेखि तलसम्म कुचो लगाएर बढार्ने हो । यसका लागि कांग्रेसका नेता कार्यकर्ताले संकल्प गर्नुपर्नेछ ।’
अदालतमा देखिएको भद्रगोलको कारक केपी ओली भएको भन्दै उहाँले भन्नुभयो, ‘अदालतमा सेटिङ गर्ने ओलीको कार्यशैलीको परिणाम हो । अख्तियारमा आफ्ना मान्छेहरु भर्ती गर्ने काम भयो । एमाले सरकारले राज्यका सबै ठाउँमा पछिल्ला तीन वर्षमा भद्रगोल अवस्था सिर्जना गरिदिएको छ ।’
