सुर्खेत । बिगत लामो समय देखी कर्णाली प्रदेशको राजधानी वीरेन्द्रनगरमा रहेको ऐतिहासिक पर्यटकस्थल काँक्रेविहार जाने सडकमा कालोपत्रे नगरेको विरोधमा स्थानीय युवाहरुले आज प्रदर्शन गरेका छन् । मंगलगढीदेखि लाटीकोईली जोड्ने सडक निर्माणको क्रममा आलटाल गरेको भन्दै स्थानीयहरुले विरोध गरेका छन् ।
धुलाम्मे सडकले दुर्घटना बढेको, आवतजावतमा समस्या भइरहेको र सडक किनारामा बस्ने नागरिकहरुलाई सास्ती भएको भन्दै ध्यानाकर्षण गर्न मंगलगढी युवा क्लवका युवाहरुले सडक अवरुद्ध गरेका हुन् । यथाशिघ्र सडक निर्माणका लागि दवाव दिन मंगलगढीमा सडक अवरुद्ध र मन्त्रालयमा केही बेर धर्ना दिएको क्लवका अध्यक्ष धनराज शाहीले जानकरी दिएका छन् ।
उनले झण्डै दुई वर्षदेखी निकै हैरानी व्यहोर्नु परेकाले तत्काल सडक कालोपत्रे गर्न माग गरे । स्थानीय युवाहरुले भौतिक पूर्वाधार तथा शहरी विकास मन्त्रालयमा धर्ना दिएर ज्ञापनपत्र समेत बुझाएका छन् ।
