कैलाली । कैलालीको टीकापुरमा एक युवकको हत्या भएको विरोधमा स्थानीयले पूर्वपश्चिम राजमार्ग अवरुद्ध गरेका हुन् ।
मंगलबार राति टीकापुर नगरपालिका–१ मा चक्कु प्रहार हुँदा लम्कीका २२ वर्षीय भुपेन्द्र बडुवालको मृत्यु भएको थियो। हत्यारा फरार रहेका छन् ।
दुई समूहबीच झडप हुँदा एक पक्षले चक्कु प्रहार गर्दा घटना भएको प्रहरीले जानकारी दिएको छ। हत्यामा संलग्नमाथि कडा कारवाहीको माग गर्दै स्थानीयले बुधबार बिहानैदेखि लम्कीचुहास्थित पूर्वपश्चिम राजमार्ग अवरुद्ध गरेका हुन्।
पीडित पक्षले बिहानैदेखि राजमार्ग अवरुद्ध पारेपछि सवारीसाधन सञ्चालनमा समस्या भएको जिल्ला प्रहरी कार्यालय कैलालीले जानकारी दिएका छन् । राजमार्ग अवरुद्ध भएपछि लम्की चुहामा सवारीसाधनको लामो लाइन लागेको छ। सडकमै सबारी राधन रोकिएपछि सयौं यात्रुहरु अलपत्र परेका छन्।
हत्यामा संलग्न भएको आशंकामा चार जनालाई नियन्त्रणमा लिएर अनुसन्धान अघि बढाइएको इलाका प्रहरी कार्यालय टीकापुरका प्रहरी निरीक्षक प्रकाश सापकोटाले जानकारी दिएका छन् ।
