काठमाडौं- नेपाल कम्युनिस्ट पार्टी (नेकपा) नेतृत्वको नेत्रविक्रम चन्द (विप्लव) ले पेट्रोलियम पदार्थको मूल्य वृद्धिविरुद्ध आन्दोलनको घोषणा गरेको छ।
नेकपाका महासचिव विप्लवले बिहीबार एक विज्ञप्ति जारी गर्दै पेट्रोलियम पदार्थको मूल्यवृद्धिको विरोधमा देशव्यापी विरोध प्रदर्शनदेखि नेपाल बन्दसम्मका कार्यक्रम घोषणा गरेको छ ।
जनताको दैनिक जीवनसँग जोडिएका पेट्रोलियम तथा खाद्यवस्तु जस्ता अत्यावश्यक वस्तुमा सरकारले निरन्तर मूल्यवृद्धि गर्दै आएको भन्दै विप्लव नेतृत्वको नेकपाले मूल्यवृद्धि विरुद्ध सशक्त प्रतिरोध गर्ने जानकारी दिएको हो । जनभावनाको कदर गर्दै मूल्यवृद्धि खारेज गर्न नेकपाले सरकारसँग अपिल गरेको छ।
मूल्य वृद्धिविरुद्ध नेकपाले २६ गते मसाल जुलुस, २७ गते दिउँसो १ देखि २ बजेसम्म देशव्यापी प्रदर्शन, २८ गते बिहान १० देखि ११ बजेसम्म चक्काजाम, २९ गते सिट्ठी जुलुस र साँझ मसाल जुलुस निकाल्ने तथा ३० गते नेपाल बन्द गर्ने कार्यक्रम सार्वजनिक गरेको छ।
नेपाल आयल निगमले पछिल्लो १० दिनमा इन्धनको मूल्य दुई पटक बढाएको छ। बुधबार रातिदेखि लागू हुने गरी निगमले थप ७५ रुपैयाँ बढाएर ग्यासको मूल्य प्रतिसिलिण्डर १५ सय ७५ रुपैयाँ कायम गरेको छ भने पेट्रोल, डिजेल र मट्टितेलको मूल्य प्रतिलिटर ३ रुपैयाँले बढाइएको छ।
