नेपालगञ्ज- गाई चराउन गएका नरैनापुर गाउँपालिका वडा नम्बर ४ पण्डितपुरुवाका लखन गडरियाको बाघको आक्रमणमा मृत्यु भएको छ ।
गडरिया कात्तिक २५ गते गाई चराउन गएका थिए । त्यो दिन उनी घर फर्किएनन् । भोलिपल्ट स्थानीय बासिन्दाले खोजी गरेका थिए । उनी भेटिएनन् नभेटिएपछि २७ गते प्रहरी कार्यालयमा निवेदन दिएका थिय ।
इलाका प्रहरी कार्यालय, भोजभगवानपुरका प्रहरी निरीक्षक बसन्त गौतमका अनुसार खोजतलासको निवेदन आएपछि जंगलतिर खोजीका लागि प्रहरी टोली गएको थियो । शनिबार राति जंगलमा गडरिया र एउटा गाई मृत भेटिएको उनले जानकारी दिएका छन् ।
स्थानीयले घटनास्थल वरपर बाघ कराएको सुनेको बताएका छन् । नरैनापुरको पर्यटकस्थल गोवर्द्धन धामबाट ५ किलोमिटर जति पूर्वपट्टी जंगलमा गडरियाको शव फेला परेको हो । पिठ्युँ बाघले खाएको छ । घाटी र शरीरका अन्य भागमा नंग्राले कोतरेको देखिएको छ ।
प्रहरीले गडरियाको शवलाई पोष्टमार्टमका लागि नेपालगञ्ज पठाएको छ । राष्ट्रिय जंगलमा समेत बाघ देखिएपछि स्थानीय त्रसित भएका छन् । बाँकेको पूर्वीगमा केही महिनाअघि बाघको आक्रमणबाट एकजनाको मृत्यु भईसकेको छ ।
