काठमाडौं । रौतहट जिल्लाको देवाही गोनाही नगरपालिका वडा नम्बर ५ टिकुलियाका संजय मुखियाका ५ वर्षीय छोरा आकाश र ४ वर्षीय छोरा विकासको मृत्यु भएको हो ।
उनीहरुको उपचारको क्रममा ज्यान गएको प्रहरीले जानकारी दिएको छ। इलाका प्रहरी कार्यालय देशवासी गोनाहीका प्रहरी निरीक्षक राजन लम्सालका अनुसार आफ्नो घरमै रहेका दुबैजना बालकहरुले शनिवार बिहान बान्ता गरेपछि उनीहरुलाई उपचारको लागि गरुडा स्थित एउटा निजि अस्पतालमा भर्ना गरिएको थियो ।
त्यहाँ उनीहरूको स्वास्थ्य अवस्थामा सुधार नआएपछि उनीहरुलाई एम्बुलेन्समा राखेर थप उपचारको लागि वीरगञ्ज लगिएको थियो ।
तर दुबै जनाको वीरगञ्जस्थित अस्पतालमा उपचारको क्रममा मृत्यु भएको हो ।
मृतक बालकहरुको बुबा वैदेशिक रोजगारको सिलसिलामा साउदीमा रहेको र घरमा उनीहरु आमा र हजुरआमासँग बस्दै आएका थिए ।
इलाका प्रहरी कार्यालय गरुडाका प्रमुख प्रहरी नायव उपरीक्षक श्रीराम भण्डारीले प्रहरीले यस घटनालाई गम्भीरतापूर्वक लिएर अनुसन्धान गरिरहेको बताउनु भएको छ ।
उहाँले पुरानो रिसीइवीको कारण कसैले विष सेवन गराइएको हुनसक्ने भन्दै प्रहरीले सबै कोणबाट अनुसन्धान सुरु गरेको बताउनु भएको छ ।
‘हामी घटनाको जानकारी प्राप्त हुनसाथ अनुसन्धानमा लागिसकेका छौँ,’ उहाँले भन्नुभयो, ‘चाडै सत्यतथ्य पत्ता लाग्नेमा हामी विस्वस्त छौँ ।’
यता पूर्वमन्त्री तथा नेकपा एमालेका नेता प्रभु साहले यो घटना संकास्पद भएको भन्दै सत्यतथ्य छानबिन गरी दोषीलाई कारवाही गर्न माग गर्नुभएको छ।
उहाँले उक्त घटनालाई मानव समाजलाईनै कलंकित तुल्याउने घटनाको संज्ञा दिँदै दोषीलाई कानूनी कार्यवाहीको दायरामा ल्याउन स्थानीय प्रशासन लगायतका सम्बन्धित सबै निकायको गम्भीर ध्यानाकर्षण गराउनुभएको छ।
