सुनकोशी गाउँपालिका(९ को सिकारीडाँडामा आज बिहान बागमती प्रदेशको प्रदेश ३(१०२२ च ९६९४ नम्बरको बोलेरो दुर्घटना भएको हो। बोलेरोमा चम्पादेवी ककनी मन्दिर दर्शन तथा एकादशी मेला हेर्न जाने भक्तजन रहेका थिए।
दुर्घटनामा सिद्धिचरण नगरपालिका(१० बेतिनी रुप्सेका ३५ वर्षीया मिठुमाया मगर, १७ वर्षीया तुलसा मगर र उमेर नखुलेका खगेन्द्र मगरको मृत्यु भएको जिल्ला प्रहरी प्रमुख गोविन्दराज काफ्लेले बताएका छन् । उनका अनुसार तीनै जनाको घटनास्थलमै मृत्यु भएको हो।
बोलेरो सडकबाट करीब ६०० मिटर तल खसेको थियो । बोलेरोमा १८ जना सवार रहेका थिए।
दुर्घटनाका गम्भीर घाइतेलाई उपचारका लागि हेलिकोप्टरमार्फत काठमाडौं पठाइएको सुनकोशी(९ का वडाध्यक्ष झनककुमार कार्कीले जानकारी दिएका छन् । दुर्घटनालगत्तै प्रहरीचौकी कोषहाट र स्थानीयले घाइतेको उद्धार गरेका थिए अन्य घाइतेको ओखलढुङ्गा सामुदायिक अस्पतालमा उपचार भइरहेको छ।
सुनकोशी(९ र चम्पादेवी गाउँपालिका(९ को सिमानामा पर्ने ककनी मन्दिरमा बर्सेनि भक्तजनको भीड लाग्ने गर्छ। एकादशीका अवसरमा एक साताभन्दा बढी मेला लाग्ने ककनी दर्शन गर्न ओखलढुङ्गा, सिन्धुली, रामेछाप, उदयपुर र सोलुखुम्बलगायतका स्थानबाट भक्तजन आउने गरेका छन्।
