बन्द गराउँदै हिँड्ने अखिल क्रान्तिकारी रुकुम पश्चिमका अध्यक्ष सहित १२ जना पक्राउ

राष्ट्रिय संञ्चार

३० कार्तिक २०७८, मंगलवार ११:२१ प्रकाशित

रुकुम । रुकुम पश्चिमको सदरमुकामका विभिन्न ठाउँमा बन्द गराउँदै हिँडेका १२ जना लाई प्रहरीले नियन्त्रण गरेको छ ।

नेकपाको चन्द समूह निकट अखिल क्रान्तिकारी रुकुम पश्चिमका अध्यक्ष सोमपाल कामीसहित १२ जनालाई नियन्त्रणमा लिइएको जिल्ला प्रहरी कार्यालयका प्रहरी निरीक्षक डेकेन्द्र शर्माले जानकारी दिएका छन् ।

मठ तथा बागबजार क्षेत्रबाट उनीहरुलाई नियन्त्रणमा लिइएको प्रहरी निरीक्षक शर्माले जानकारी दिएका हुन् । गन्तव्यमा हिँडेका यात्रु र सवारीलाई सकेसम्म सुरक्षा प्रदान गरिरहेको प्रहरीको भनाई रहेको छ ।

सदरमुकाममा बन्दको प्रभाव भने परेको छ । बिहानैदेखि यातायातका साधन चलेका छैनन् भने बजार पनि खुलेका छैनन् । निजी तथा सामुदायिक विद्यालयका विद्यार्थीहरु पनि विद्यालय गएका छैनन् ।