सुर्खेत । नेपाली काग्रेसको अहिले महाधिवेशनको चलिरहेको छ । वडा, प्रदेश र क्षेत्रको अधिवेसन सम्पन्न भइसक्दा अब जिल्लाको नेतृत्वमा जोडघटाउ सुरु भएको छ ।
कांग्रेस महामन्त्री पूर्णबहादुर खड्काको गृहजिल्ला सुर्खेतमा यसपल्ट उनैले चाहेको व्यक्तिले जिल्ला नेतृत्व पाउने पक्का पक्कि जस्तै भएको छ । पछिल्लो निर्वाचनमा थानि (पौडेल) समूहले जिते पनि यसपल्ट वडादेखि क्षेत्रसम्मका झण्डै तीन चौथाई प्रतिनिधि खड्का (देउवा) समूहका रहेका छन् ।
आज सुर्खेतमा महाधिवेशन प्रतिनिधिदेखि क्षेत्रीय सभापतिका लागि मतदान सुरु भएको छ । ‘महाधिवेशन प्रतिनिधिको रुपमा यदि थानी समूहबाट कोही पनि विजय बनेनन् भने जिल्ला सभापतिमा दाबी गर्ने अधिकार थानी समूहसँग रहने छैन । त्यस्तो भएको खण्डमा खड्काले निर्वाचन क्षेत्र नम्बर एक बाटै सभापति ल्याउन सक्छन्,’ कांग्रेसका एक स्थानीय नेता भन्छन्, ‘यदि पौडेल समूहबाट कोही महाधिवेशन प्रतिनिधिमा जितेर आएको खण्डमा भने खड्काले निर्वाचन क्षेत्र नम्बर दुइको भ्याली वा पश्चिम क्षेत्रबाट सभापति उठाउने छन् ।’
कांग्रेस स्रोतका अनुसार यदि अर्को समूहबाट महाधिवेशन प्रतिनिधि नजितेको खण्डमा देउवा पक्षका पश्चिमका नेताहरु उपेन्द्र थापा, टोपबहादुर रावत, यज्ञबहादुर विसी, कलम खत्रीलगायतका पुराना कांग्रेस नेताहरु खड्का सामु निरीह बन्ने छन र उनीहरुको वार्गेनिङ पावरसमेत समाप्त हुनेछ ।
त्यस्तो भएको खण्डमा आगामी स्थानीय तहदेखि प्रदेश सभाको निर्वाचनमा समेत पश्चिम सुर्खेतका नेताहरुले भूमिका खेल्न नपाउने सम्भावना बढेको देखिन्छ ।
खड्काले जिल्ला सभापतिका लागि भ्यालीमा हुँदा उनका भाई विष्णु खड्का वा उनी नभए क्षेत्र नम्बर एकका पूर्व क्षेत्रीय सभापति खड्क पोखरेललाई उम्मेदवार बनाउनेछन् । यदि उनीहरु उम्मेदवार भएको खण्डमा साविकको निर्वाचन क्षेत्र नम्बर एक, दुई मिलेर अत्याधिक बहुमतले जितिने अनुमान रहेको छ। र त्यस्तो भएको खण्डमा साविक निर्वाचन क्षेत्र नम्बर तिनलाई सहजै पाखा लगाउन खड्का सफल हुनेछन् ।
सुर्खेतमा नौ वटा स्थानीय तह छन् । ती मध्ये चौकुने गाउँपालिका बाहेक आठवटामा खड्का समूहले एकलौटी जित हात पारेको छ भने यस्तै चार ओटा प्रदेश निर्वाचन क्षेत्र भएको सुर्खेतमा चारै सभापति सहित प्यानलनै खड्का (देउवा) पक्षले जितेको छ ।
