काठमाडौं । कर्णाली प्रदेशले बुधबार यू–१९ राष्ट्रिय क्रिकेट प्रतियोगितामा लुम्बिनी प्रदेशलाई १४० रनले हराएको छ ।
सुवासले ९० बलमा ७६ रन बनाएपछि कीर्तिपुरस्थित त्रिवि अन्तर्राष्ट्रिय क्रिकेट मैदानमा टस जितेर पहिला ब्याटिङ गरेको कर्णालीले निर्धारित ५० ओभरमा आठ विकेट गुमाएर २३२ रन बनाएको थियो । २३३ रनको लक्ष्य पछ्याएको लुम्बिनीले २३.५ ओभरमा सबै विकेट गुमाएर ९२ रन मात्र बनाउन सक्यो ।
कर्णालीले सुरुमै दुई विकेट गुमाए पनि सुवास र कप्तान निश्चल रावलले टोलीको इनिङ उकासेका थिए । ओपनर मनीष थापा शून्यमा आउट हुँदा अर्का ओपनर विपीन रावल ३२ रन बनाएर पवेलियन फर्किएका थिय । त्यसपछि सुवास र निश्चलले तेस्रो विकेटका लागि १२२ रनको साझेदारी गरेका थिए ।
सुवासले ९० बलमा नौ चौका र तीन छक्कासहित ७६ रन बनाउँदा मनीषले पाँच चौकासहित ४४ रन बनाएका थिय । प्रकाश जैशीले २५ रन बनाउँदा सन्दीप शाही १० रनमा अविजित रहे । कर्णालीका अरू खेलाडीले दोहोरो अंकमा रन बनाउन सकेनन् ।
लुम्बिनीका दुर्गेश गुप्ताले चार तथा विशालविक्रम केसीले दुई विकेट लिए । मोहम्मद हुसेन र वासिर अहमदको नाममा एक/एक विकेट रह्यो ।
कर्णालीका प्रकाश जैशीले पाँच, युनिश सिंहले तीन र अनुज चुनराले दुई विकेट लिएपछि लुम्बिनीका कुनै पनि ब्याट्सम्यानले खुलेर खेल्न सकेनन् । लुम्बिनीका प्रज्ज्वल थापाले सबैभन्दा धेरै २८ रन बनाउँदा दुर्गेशले २० र आकाश त्रिपाठीले १५ रन बनाए । अरूले दोहोरो अंकमा रन बनाउन सकेनन् ।
लुम्बिनीले मंगलबार मूलपानी क्रिकेट मैदानमा सम्पन्न पहिलो खेलमा गण्डकीलाई नौ विकेटले हराएको थियो ।
