तालिबानी र इरानी सेनाबीच भिडन्त

राष्ट्रिय संञ्चार

१६ मंसिर २०७८, बिहीबार १०:५८ प्रकाशित

एजेन्सी- बुधबार तालिबानी लडाकु र इरानी सेनाबीच भिडन्त भएको छ। अफगानिस्तान–इरान सीमामा ‘भुलबस’ भिडन्त भएको अलजजिरामा खबर छ।

भिडन्तमा मानवीय क्षति भने नभएको समाचारमा जनाइएको छ।

बुधबार बाहिर आएका विभिन्न भिडियोहरूमा तालिबानी लडाकु गस्तीमा रहेको देखिएको छ। समाचारअनुसार तालिबानी लडाकुले पहिले गोली प्रहार गरेका थिए। त्यसको जवाफमा इरानी सेनालेसमेत फाइरिङ गरेको हो।

इरानी सञ्चारमाध्यम तास्निमले सागलक गाउँमा भिडन्त भएको बताएको छ। तास्निमका अनुसार अफगानिस्तानसँगको सिमानामा चोरी पैठारी नियन्त्रणका लागि पर्खाल लगाइएको छ।

सो पर्खाल हुँदै केही इरानी कृषकहरू सिमा नाका पार गरिरहेका बेला तालिबान लडाकुले गोली प्रहार गरेका थिए। लडाकुले सिमा नियम उल्लङ्घन भएको सोचेर फाइरिङ गरेको समाचारमा उल्लेख छ। यद्यपि ती इरानी किसान इरान क्षेत्रमै रहेको बताइएको छ।