जुम्ला । जुम्लामा बाहिरबाट आउने आन्तरिक तथा वाह्य पर्यटकले स्याउभन्दा पनि स्याउका परिकार बढी रुचाउन थालेपछि खाद्य प्रविधि तथा गुण नियन्त्रण कार्यालय जुम्लाले स्याउ किसानलाई तीन दिने स्याउ प्रसोधन तालिम दिएको छ।
स्याउको सिजन अफ भइसकेपछि परिकारको व्यापार फस्टाउने भएकाले खाद्य प्रविधि तथा गुण नियन्त्रण कार्यालय जुम्लाले तीन दिने तालिम दिइएको खाद्य प्रविधि तथा गुण नियन्त्रण कार्यालय जुम्लाका कार्यालय प्रमुख तथा खाद्यअनुसन्धान अधिकृत डाक्टर ईश्वर सुवेदीले जानकारी दिएका छन् ।
समयअनुसार जुम्लाका किसानले स्याउ बेच्ने मात्र नभइ त्यसबाट बन्ने विभिन्न परिकार बनाई दोहोरो फाइदा लिन सक्ने छन्, उनले भने, स्याउबाट बन्ने जुस, जाम, चाना उत्पादनमा यहाँका किसानलाई व्यस्त बनाउन आवश्यक छ ।
जुम्लाका प्रमुख जिल्ला अधिकारी विजयाकुमारी प्रसाईले खाद्य प्रविधि तथा गुण नियन्त्रण कार्यालय जुम्लाले दिइएका तालिम नतिजामुखी हुनु पर्ने बताएकि छन् । उनले किसानलाई तालिम भत्तामुखी नभएर व्यवहारमा लागु गर्न आग्रह गरिन् । उनले भनिन, सबै जनाले आफुले सिकेका सिप सबैलाई सिकाउन आवश्यक छ । अबको किसान आत्मानिर्भर हुन पर्छ। किसान आत्मानिर्भर नभएको खण्डमा जुम्ला आत्मनिर्भर हुन सक्दैन।
तालिममा सहभागी स्याउ किसानले पनि तालिमपछि स्याउका परिकार बनाएर बिक्री गर्ने प्रतिबद्धता जनाएका छन् । किसानलाई स्याउको दाना बेचेर मात्रै नभइ स्याउका परिकारबाट अम्दानी गर्न सक्ने बनाउन यस्ता खालका तालिम दिएको प्राविधिक साहयक भरतबहादुर रोकायाले जानकारी दिएका छन् ।
