जयपृथ्वी नगरपालिका-३, बझाङकि कल्पना रोकायाले झुण्डिएर आत्महत्याको प्रयास गरेको प्रहरीले जनाएको छ ।
अनुसन्धानका लागि दोस्रो पटक म्याद थप गर्ने तयारी हुँदै गर्दा शौचालय जाने बहाना बनाएर उनले जिल्ला प्रहरी कार्यालयको हिरासतको शौचालयभित्रै झुण्डिएकी थिइन् । आफूले प्रयोग गर्ने गरेको तौलियालाई शौचालयको भेन्टिलेसनमा रहेको रडमा बाँधेर उनले आत्महत्याको प्रयास गरेको बझाङका प्रहरी प्रमुख डिएसपी ज्ञानबहादुर विष्टले जानकारी दिएका छन् ।
‘पहिले नै योजना बनाएकी रहिछन्’ विष्टले भने ‘पासो लाउन प्रयोग गरेको तौलिया लचकदार भएकोले उनको ज्यान जान पाएन ।’ रोकायाले पासो लगाइसकेपछि चिच्याएको सुनेर त्यहाँ रहेका महिला प्रहरीहरूले शौचालयको ढोका फोडेर उनको उद्धार गरेको उनको भनाइ छ । तौलिया लचकदार भएको कारण तन्किएर भुइँ छोएकोले उनको ज्यान जोगिएको उनले बताएका छन् ।
उनको अहिले जिल्ला अस्पताल बझाङमा उपचार भइरहेको छ । उनको होस आएको र अवस्था खतरामुक्त रहेको जिल्ला अस्पतालका डाक्टर मिलन खड्काले बताए । ‘अहिले होस आइसकेको छ । दुई/तीन दिन अरु निगरानी गरेपछि डिस्चार्ज हुन्छ’ खड्काले भने ।
रोकायाले हिरासतमा फेरि पनि आत्महत्याको प्रयास गर्न सक्ने भएकोले प्रहरीले विषेश निगरानी गर्ने डिएसपी विष्टले जानकारी दिए । ‘कस्तो सुरक्षा व्यवस्था गर्ने भनेर सरकारी वकिलसँग सल्लाह गरिरहेका छौँ । फेरि पनि उनले यस्तो प्रयास गर्न सक्छिन् भन्नेमा हामी सर्तक छौँ,’ विष्टले भने ।
यसअघि मंसिर ४ गते नै प्रहरी हिरासतमा एक वृद्धाको पनि मृत्यु भएको थियो । आत्महत्या दुरुत्साहनसम्बन्धी मुद्दाको अनुसन्धानका लागि हिरासतमा रहेकी केदारस्युँ गाउँपालिका–२ की ७७ वर्षीया विष्णादेवी रावलको हिरासत कक्षमै बेहोस भएपछि अस्पताल लैजाने क्रममा मृत्यु भएको प्रहरीले जनाएको छ । उनको हृदयघातको कारण मृत्यु भएको चिकित्सकहरूले बताएका छन् ।
