काठमाडौँ । नेपाली कांग्रेको १४ औं महाधिवेशन अन्तर्गत केन्द्रीय समितिका लागि हुने निर्वाचनमा संस्थापन पक्ष र नेता कृष्णप्रसाद सिटौला पक्ष मिलेर लडने भएका छन् ।
सभापति शेरबहादुर देउवा र नेता सिटौला पक्षबीच पदाधिकारीमा भागबण्डा मिलेको हो । सिटौला समूहका प्रदीप पौडेललाई महामन्त्रीको उम्मेदवार बनाउने गरी सहमति भएको हो ।
महाधिवेशनको उदघाटन सत्रमै सिटैलाले पौडेलका लागि भोट माग्नुभएको थियो । सभापति देउवा र नेता सिटौलाबीच भएको सहमतिले गगन थापासहितका नेताको निर्वाचन अभियानमा धक्का पुग्ने भएको छ ।
यसैबीच, संस्थापन इतर समूहले भने अझै पनि साझा उम्मेदवार तय गर्न सकेको छैन । शुक्रबार राति अबेरसम्म भएको इतर समूहको बैठकले पनि कुनै गर्न सकेन । आकांक्षी नेताबीच सहमत हुन सकेनन् । नेताहरूले छलफल रहेको भन्न चाहिँ छाडेका छैनन् । विशेषगरी डा। शेखर कोइराला र नेता प्रकाशमान सिंहले अडान छाडनु भएन ।
इतर समूहबाट वरिष्ठ नेता रामचन्द्र पौडेल, महामन्त्री डा। शशांक कोइराला, सहमहामन्त्री प्रकाशमान सिंह र केन्द्रीय सदस्य डा। शेखर कोइराला सभापतिका आकांक्षी हुनुहुन्छ । वरिष्ठ नेता पौडेल र डा। शशांकले सहमति हुने भए आफूहरू पछि हटने जानकारी गराइसक्नु भएको छ ।
सभापतिसँगै अरू पदाधिकारी र सदस्यमा पनि सहमति जुटेको छैन । शनिबार १० बजेसम्म सभापतिसँगै सबै पदका उम्मेदवारको टुंगो लाग्ने जानकारी नेताहरूले दिनुभएको छ । शुक्रबार सुरू भएको कांग्रेसको महाधिवेशन अन्तर्गत शनिबार नेतृत्व चयनका लागि बिहान १० बजेदेखि साँझ ५ बजेसम्म मनोनय दर्ता हुनेछ कार्यक्रम छ ।
