काठमाडौं- पछिल्लो २४ घण्टामा १२ हजार ८ जनामा कोभिड(१९ संक्रमितको पहिचान भएको छ। २५ हजार ९ सय ९ जनामा गरिएको परीक्षणमा झन्डै आधामा संक्रमण पुष्टि भएको हो। आज कुल परीक्षणको ४६.३ प्रतिशतमा संक्रमण पुष्टि भएको छ ।
हिजोको तुलनात्मक रुपमा संक्रमित संख्या कम देखिएको थियो। हिजो १० हजार ३ सय १९ जनामा संक्रमण देखिएको थियो। हिजो २१ हजार २ सय १ जनामा परीक्षण गरिएको थियो।
आज हिजोको तुलनामा १ हजार ६ सय ८९ जना धेरै संक्रमित थपिएका हुन्। यस अवधिमा १८ हजार १ सय ३ जनाको आरटी पीसीआर र ७ हजार ८ सय ६ जनाको एन्टीजेन परीक्षण गरिएको थियो। आरटी पीसीआर परीक्षण गरिएका नमुनामध्ये ५२.१ प्रतिशत (९४३२)मा संक्रमण पुष्टि हुँदा एन्टीजेन परीक्षण गरिएका नमुनामध्ये ३३ प्रतिशत (२५७६) मा संक्रमण देखिएको हो। पछिल्लो २४ घन्टामा ८ जनाको संक्रमितको मृत्यु भएको छ। यस अवधिमा ३ हजार ४० जना संक्रमण मुक्त भएका छन्।
यससँगै कूल संक्रिय संक्रमितको संख्या ८८ हजार ९ सय ३४ पुगेको स्वास्थ्य तथा जनसंख्या मन्त्रालयले जनाएको छ। यस अवधिमा २ लाख ३९ हजार ८ सय ५१ जनाले कोभिड(१९ विरुद्धको खोप लगाएका छन्।
