एजेन्सी- पाकिस्तानमा पछिल्ला केही दिनमा भएको भारी वर्षा र हिमपातका कारण ४१ जनाको ज्यान गएको जानाएको छ । शनिबारसम्म ४१ जनाको भारी वर्षा र हिमपातमा परेर मृत्यु भएको अधिकारीहरुले बताएका छन् ।
त्यसैगरी सयौँ व्यक्ति विस्थापित भएका पनि सो समाचारमा उल्लेख गरिएको छ । पाकिस्तानका अधिकारीहरुले ठूलो संख्याका भौतिक संरचनामा पनि क्षति पुगेको बताएका छन् । प्राकृतिक प्रकोप व्यवस्थापन विभागले शनिबार रातिसम्म अविरल रुपमा पानी परिरहेको बताएको छ । देशको उत्तरी क्षेत्र मुरीमा एक सवारी साधन नै हिउँमा फसेको र त्यसमा परेर २२ जनाको ज्यान गएको थियो ।
सवारी साधन हिउँमा फसेपछि निस्किन नसकेको प्रहरीले जानकारी दिएको छ । त्यस दुर्घटनामा परेर अरु कैयौँ व्यक्ति घाइते पनि भएको बताइएको छ । मुरीमा भारी मात्रामा हिमपात भएको छ । त्यसमा परेर विदेशी र स्वदेशी पर्यटकका गरी सयौँ सवारी साधन फसेका छन् । ती सवारी साधनको उद्धारका लागि पाकिस्तानको सरकारले ठूलो संख्यामा प्रहरी र उद्धारकर्मी परिचालन गरेको बताएको छ ।