माघ २ गते आइतबार पनि सार्वजनिक विदा

राष्ट्रिय संञ्चार

३० पुष २०७८, शुक्रबार १५:४९ प्रकाशित

बुटवल- लुम्बिनी प्रदेश सरकारले आइतवार सार्वजनिक विदा दिने निर्णय गरेको छ। माघे संक्रान्तीको अवसरमा लुम्बिनी प्रदेश सरकारले दुई दिन सार्वजनिक विदा दिने यसअघिको निर्णयलाई निरन्तरता दिएपछि लुम्बिनीमा माघ २ गते आइतबार सार्वजनिक विदा हुने भएको छ ।

प्रदेश सरकार गठन भएको पहिलो वर्षदेखि थारु र मगर समुदायको महान् पर्व माघे संक्रान्ति र माघीको उपलक्ष्यमा प्रदेश सरकारको तर्फबाट माघ १ र २ गते प्रदेशभर सार्वजनिक विदा दिइँदै आएको छ।

विगतका दिनमा प्रदेश सरकारको तर्फबाट पुस महिनाको अन्तिम दिन साँस्कृतिक झाँकीसहित माघे संक्रान्ति एवं माघी मिलन कार्यक्रम आयोजना गर्ने गरिएकोमा यस पटक कोभिड(१९ को तेस्रो लहर र ओमोक्रन भेरियन्टको त्रासले कार्यक्रम स्थगित गरिएको मुख्यमन्त्री कुलप्रसाद केसीका प्रेस संयोजक मानसिंह बिकले जानकारी दिएका हुन् ।