कर्णाली- जुम्लाको तातोपानी गाउँपालिका ८ जुम्लाको टोप्ला गाउँबाट एक दिनको दूरीमा रहेको गाग्रा पाटनको गाग्रा, एडिओडार, खोटीसल्ला र ध्वनि लेकमा ५५ जना हिउँमा फसेका छन्। २० माघको हिमपातका कारण सेतक चिनी (खिरउलो) टिप्न गएका उनीहरू हिउँमा फसेका थिए ।
उनीहरूको उद्धारका लागि कर्णाली प्रदेश सरकारले हेलिकोप्टर पठाउन तयारी गरेको छ ।
गाग्रा लेकमा फसेका ५५ जनाको राहत तथा उद्धारका लागि तत्काल ड्राइफुडसहित नेपाली सेनाको सानो हेलिकोप्टर पठाउने तयारी भईरहेको प्रदेश सरकारका मुख्यमन्त्री जीवनबहादुर शाहीले जानकारी दिएका छन् ।
नेपाली सेनाको ठुलो हेलिकप्टर नभएका कारणले अहिले सानो हेलिकप्टरबाट त्यहाँ ड्राईफुट खसाल्ने र ठुलो हेलिकप्टरबाट उद्दार गरिने मुख्यमन्त्री शाहीले बताए ।
चिउरा, दालमोठ, चाउचाउ जस्ता खानेकुरा लिएर जाने तयारी भइरहेको स्थानीय सुरतबहादुर शाहीले जानकारी दिएका छन् ।
हिउँमा फसेका मध्ये जैकुवाँरा शाही र तातोपानी ७ बाह्रगाउँका मुनबहादुर रावतको चिसोमा कारणले मृत्यु भएको शाहीले बताएका छन् ।
