काठमाडौं- आईसीसी टी–२० विश्वकप ग्लोबल क्वालिफायर ‘ए’ र त्यसअघि हुने चार देशीय टी–२० सिरिज खेल्न नेपाली राष्ट्रिय क्रिकेट टोली आज ओमान जाँदै छन ।
नेपाली टोली साँझ साढे ६ बजे ओमान प्रस्थान गर्ने क्यानका क्रिकेट म्यानेजर विनोद दासले जानकारी दिएका छन् । दासका अनुसार यसअघि साढे ८ बजेको समय तय भए पनि फ्लाइट प्रिपोन्ड (अघि सरेको) हो ।
सन्दीप लामिछानेको कप्तानीमा रहेको नेपाल दोस्रो पटक विश्वकप खेल्ने लक्ष्यसहित ओमान जान लागेको हो ।
ग्लोबल क्वालिफायर ‘ए’ का खेलहरु यही फेब्रुअरी १८ देखि २४ सम्म हुँदैछ । क्वालिफायर ‘ए’ को पनि समूह ‘ए’ मा नेपालसहित घरेलु टोली ओमान, क्यानडा र फिलिपिन्स छन् । यस्तै समूह ‘बी’ मा आयरल्याण्ड, युएई, बहराइन र जर्मनी रहेका छन् ।
नेपालले उदघाटन खेलमै घरेलु टोली ओमानसँग खेल्दैछ । यस्तै नेपालले दोस्रो खेल फिलिपिन्सविरुद्ध फेब्रुअरी १९ र तेस्रो खेल क्यानडाविरुद्ध फेब्रुअरी २१ मा खेल्ने तालिका रहेको छ ।
दुवै समूहको खेलपछि शीर्ष दुई टोली सेमिफाइनल पुग्नेछन् र सेमिफाइनल जित्ने दुई टोली फाइनल पुग्दै अक्टोबर नोभेम्बरमा अष्ट्रेलियामा हुने टी–२० विश्वकपमा छनोट हुनेछन् ।
त्यसअघि नेपालले फेब्रअरी ११ देखि १४ सम्म ओमानमै हुने चार देशीय टी–२० सिरिज खेल्नेछ । जसमा नेपालसहित आयरल्यान्ड, युएई र ओमानले प्रतिस्पर्धा गर्नेछन् । यस सिरिजलाई क्वालिफायरको तयारीको रुपमा हेरिएको छ ।
सन्दीपको नेतृत्वमा १६ सदस्यीय टोली यसअघि नै घोषणा भइसकेको छ । तर कोभिड–१९ को प्रभावले गर्दा टिममा केही खेलाडी थपिन सक्ने पनि सम्भावना रहेको बताएको छ ।
क्रिकेट म्यानेजर विनोद दासले यसबारे क्यानको आधिकारिक धारणा केही समयपछि आउने जानकारी दिएका छन् । सन् २०१४ मा नेपाललाई पहिलो पटक टी–२० विश्वकप पुर्याएका पुबुदु दासानायके नै यसपटक प्रशिक्षक छन् । त्यसैले पनि पुबुदु र नेपाली टिम फेरि विश्वकप पुग्नेमा आत्मविश्वासी देखिएको छ ।
