काठमाडौं- जिल्ला प्रहरी कार्यालय कपिलवस्तुले सात थान भरुवा बन्दुकसहित तीन जनालाई पक्राउ गरेको छ ।
बाणगंगा- २ स्थित मनकामना सामुदायिक वनबाट दुई थान भरुवा बन्दुकसहित दुई जना र वाणगंगा- ९ चौवास्थित एक घरबाट पाँच थान भरुवा बन्दुकसहित एक जनालाई पक्राउ लिएको जिल्ला प्रहरी प्रमुख एसपी दानबहादुर कार्कीले जानकारी दिएका छन् ।
उनकाअनुसार मनकामना सामुदायिक वनभित्र केही ब्यक्ति भरुवा बन्दुकसहित हिँडिरहेको गोप्य सूचनाको आधारमा शनिबार राति प्रहरी निरीक्षक दिनेश गुरुङको कमाण्डमा प्रहरी टोली खटिएको थियो । टोलीले अर्घाखाची शितगंगा-१४ का ५० वर्षीय विरबहादुर सोमै मगर र २८ वर्षीय खिमबहादुर मगरलाई दुई थान एकनाले भरुवा बन्दुक (लोड गरिएको अवस्थामा) सहित नियन्त्रणमा लिएको हो ।
त्यसैगरी चौवा निवासी ६० वर्षीय रामसमुज थारुको घरमा खानतलासी गर्ने क्रममा गोठको छानो मुनि प्लास्टिकले छोपेको राखेको अवस्थामा लोड गरी राखिरहेको पाँच थान भरुवा बन्दुक बरामद गरेर थारुमाथि अनुसन्धान थालेको छ ।
तीनै जनामाथि हातहतियार मुद्दामा म्याद थप भई थप अनुसन्धान भैरहेको कपिलवस्तु प्रहरीले बताएको छ ।
