काठमाडौं । संस्कृति, पर्यटन तथा नागरिक उड्डयन मन्त्री प्रेमबहादुर आलेले अश्लील गाली गलौज गरेको अडियो सार्वजनिक भएको छ । अडियोमा मन्त्री आलेले अश्लील गाली गर्दै एक युवकलाई ठेगान लगाउने धम्की दिएका छन् ।
अडियो कहिलेको हो भन्ने खुलेको छैन । अडियोमा मन्त्रीले गाली गरेका युवक जगत ओली भएको खुलेको छ । सोमबार सार्वजनिक अडियो सुन्दा युवकले आलेका बारेमा केही लेखिदिएपछि उनी आक्रोसित भएको लख काट्न सकिन्छ । युवकले उनका बारे मिडिया या सामाजिक सञ्जाल केमा लेखे भन्ने पनि अडियोबाट प्रष्ट भएको छैन ।
सार्वजनिक अडियोको सुरुवातमै मन्त्री आले ती युवकप्रति आक्रोसित देखिन्छन् । आफ्नोबारे गलत कुरा लेखिदिएको भन्दै अश्लील गालीगलौजमा उत्रिएका आलेले युवकलाई ठेगान लगाउनेसम्मको चेतावनी दिएका छन् । त्यस क्रममा आलेले युवकलाई ‘कहाँ छस्’ भनेर सोध्छन् । युवकले आफू भारतको मुम्बइमा भएको भन्दै पूरा ठेगाना दिएको सुन्न सकिन्छ । यो क्रममा युवकले मन्त्री आलेलाई तस्करको आरोप लगाएका छन् । युवकले यस्तो बताएपछि मन्त्री आले थप आक्रोसित हुँदै अश्लील गाली गलौजमा उत्रिएको सुन्नसकिन्छ ।
मन्त्रीले अमाचकारी गाली गरेको अडियो अहिले सामाजिक सञ्जालमा भाइरल छ ।
मन्त्री आलेको सचिवालयले पनि त्यो अडियो मन्त्री आलेकै भएको स्वीकार गरेको छ । सचिवालयका अनुसार, त्यो अडियो आलेकै भए पनि सार्वजनिक पद धारण गर्नु पूर्व एक वर्षअघिको हो । तर एउटै पार्टीमा छँदा ओली आलेको समर्थक रहेकाले सचिवालयको दाबी पत्याउन सकिँदैन ।
सार्वजनिक पदमा नहुँदाका बखत भएका अनौपचारिक एवं व्यक्तिगत विषयलाई अनधिकृत रूपमा बाहिर सार्वजनिक गरी मन्त्रीको छविमा आँच आउने काम गरिएको आलेका प्रमुख स्वकीय सचिव हेमन्त रेग्मीले जानकारी दिएका छन् ।
मन्त्री आलेविरुद्ध षड्यन्त्र : सचिवालय
संस्कृति, पर्यटन तथा नागरिक उड्डयनमन्त्री प्रेमबहादुर आलेविरुद्ध तथ्यहीन आरोप लगाएर बदनाम गराउन खोजिएको भन्दै उनको सचिवालयले आपत्ति जनाएको छ । निरन्तररूपमा मन्त्री आले तथा नेकपा(एकीकृत समाजवादी)का नेताहरूविरुद्ध सामाजिक सञ्जालमा असभ्य टिप्पणी गरिएको भन्दै पर्यटनमन्त्री आलेका प्रमुख स्वकीयसचिव हेमन्त रेग्मीले विरोध जनाउएका छन् ।
सार्वजनिक पदमा नहुँदाका बखत भएका अनौपचारिक एवं व्यक्तिगत विषयलाई अनधिकृतरूपमा बाहिर सार्वजनिक गरी मन्त्रीको छविमा आँच आउने काम गरिएको भन्दै दोषीमाथि कडा कारबाही गर्न स्वकीयसचिव रेग्मीले आग्रह गरेका छन् । मन्त्री आलेमाथि सुदूरपश्चिम प्रदेशको अछाम घर भई हाल भारतको मुम्बई बस्दै आएका जगत् ओलीको नामबाट निरन्तररूपमा उनिमाथि ब्ल्याकमेल गर्ने, उनलाई उत्तेजित गर्ने र सोही विषयलाई सामाजिक सञ्जालमा राख्ने तथा धम्क्याउने काम भएको भन्दै सचिवालयले खेद प्रकट गरेको हो ।
मन्त्री आलेले पछिल्लो समय जनमुखी कार्य गरेर लोकप्रिय हुन थालेपछि अत्तालिएका केही व्यक्तिले मन्त्री आलेविरुद्ध षडयन्त्रपूर्वक उत्तेजित पार्न खोजिएको भन्दै त्यस्तो भ्रममा नपर्न आम जनसमुदायलाई आग्रह समेत गरेको छ । नेता आले समाजवादीमा आवद्ध भएपछि पूर्व पार्टीका कार्यकर्ताले उनविरुद्ध सामाजिक सञ्जालमा गालीगलौज गर्नुका साथै पटक–पटक मानसिक तनाव दिने र अश्लिल शब्द प्रयोग गर्दै आएकोप्रति सचिवालयले दुःख व्यक्त गरेको छ ।
हेर्नुस् यो भिडीयो
