कर्णाली- दैलेख प्रहरीले ५५ लाख बराबरको चाँदीजस्तो देखिने गहनासहित दुई जनालाई पक्राउ गरेको छ । सोमबार दिउँसो करिब साढे दुई बजेतिर सुर्खेतबाट दैलेखतर्फ जाँदै गरेको भे १ च ३२१३ नम्बरको डबल क्याप बोलेरो गाडीबाट उक्त सामान बरामद गरेको बताएको छ ।
साबिकको कैलाली जिल्ला नारायणपुर गाविस वडा नं ९ घर भई हाल तुल्सीपुर उपमहानगरपालिका-१७ बस्ने डम्बरप्रसाद ढुंगाना र चालक टीकापुर नगरपालिका-९ घर भई हाल वीरेन्द्रनगर ४ ऐरिचोक बस्ने २६ वर्षीय दीपक पाण्डेलाई प्रहरीले पक्राउ गरेको बताएको छ ।
जिल्ला प्रहरी कार्यालय दैलेखका अनुसार ५५ लाख ४० हजार १ सय ३९ रुपैयाँ बराबरको चाँदीजस्तो देखिने गरगहना लगायत विभिन्न सामानहरु बरामद गरिएको हो । चाँदीजस्तो देखिने वस्तुबाट बनेको विभिन्न गहनाहरु २१ हजार ७ सय २५ किलोग्राम र अन्दाजी २४ लाख ७६ हजार ६ सय ५० मूल्य बराबरको र १ लाख ६३ हजार ४ सय ८९ रुपैयाँ बराबरको पोते, पत्थर र गहना राख्न प्रयोग हुने डिक्बाहरु लगायतका सामानहरु बरामद गरिएको जिल्ला प्रहरी कार्यालय दैलेखका प्रमुख भुवनेश्वर शाहले जानकारी दिएका छन् ।
उनले बोलेरो गाडीसहित दुई जनालाई नियन्त्रणमा लिई राजश्व अनुसन्धान कार्यालय कोहलपुरमा पठाइएको जानकारी दिएका छन् ।
