हुम्ला – जनताको शान्ति सुरक्षाको जिम्मा पाएको नेपाल प्रहरीका हुम्ला जिल्लाभर स्थापना भएका अधिकांश प्रहरी चौकी भाडाका रहेको पाईएको छ । हुम्लाका १४ वटा प्रहरी चौकी घर भाडाका सञ्चालित रहेका छन् ।
जिल्ला प्रहरी कार्यालयका प्रहरी नायब उपरीक्षक हेरम्ब शर्माले जिल्ला प्रहरी कार्यालयसहित २५ वटा प्रहरी चौकीमध्ये १४ वटा भाडाका घरमा सञ्चालन हुँदै आएको जानकारी दिएका छन् ।
आफ्नो भवन नहुँदा निजी घरमा बसेका प्रहरी चौकीको घर बहाल कतै प्रहरी आफैले र कतै गाउँपालिकाले तिर्दै आएका छन्। हिल्सास्थित सीमा प्रहरी चौकसँगै यारी, धारापोरी, खार्पु, याङ्चु बजार, सर्केदेउ, मेल्छाम पिप्लाङ, मिमी, गल्फागार्ड, छप्रेला र मैला कवाडीका प्रहरी चौकी भाडाका घरमा बस्दै आएका छन।
त्यस्तै जिल्ला ट्राफिक प्रहरी कार्यालय र अस्थायी प्रहरी पोष्ट तुम्च पनि निजी घरमा भाडामा बस्दै आएका छन्। भाडाका घरमा सञ्चालन हुँदै आएका प्रहरी चौकीले विभिन्न समस्या झेल्दै आएको बताइएको छ। भाडाका घरमा प्रहरीलाई पर्याप्त कोठाको व्यवस्था नभएको बुझिएको छ। जसले गर्दा काममा बाधा पुग्ने गरेको गुनासो प्रहरीको छ।
जिल्लामा ६ वटा प्रहरी कार्यालय र चौकीमात्र आफ्नै भवनमा बस्दै आएका छन्। अन्य सुरक्षा दिनुपर्ने निकायमा बस्दै आएका छन्। सदरमुकाम सिमकोटमा रहेको इलाका प्रहरी कार्यालय डिभिजन वन कार्यालयमा बस्दै आएको छ। आफ्नै भवनमा बसेका अधिकांश प्रहरी चौकीसँग आफ्नो जग्गासमेत छैन। स्थानीयसँग जग्गा उपलब्ध गराउनका लागि पहल भइरहेको जिल्ला प्रहरी कार्यालयले जनाएको छ। जग्गा प्राप्त भएपछि आफ्नै भवन निर्माण गर्न पहल गरिने कार्यालयले बताएको छ।
