दैलेख- जिल्ला प्रहरी कार्यालय दैलेखमा सेवा लिन गएका एक सेवाग्राही प्रहरीबाट कुटिएका छन् । उनि गएको आइतवार सेवा लिन गएका नारायण नगरपालिका–६ बसपार्कका ओम रेग्मी दैलेखका प्रहरी निरीक्षक (इन्स्पेक्टर) इन्द्रजीत सुनारबाट कुटिएका हुन् ।
इन्स्पेक्टर सुनारले सेवाग्राही रेग्मीलाई दुर्व्यवहार गरी कुटपिट गरेको भिडिओ समेत बाहिरिएको छ । उक्त भिडिओका अनुसार सुनारले दादागिरी देखाँउदै आफूलाई कसैले पनि कानून र कामको बारेमा जानकारी नदिन भन्दै सेवाग्राहीलाई अपशब्द समेत प्रयोग गरेका छन् ।
चार महिनाअघि हराएको मोबाइल फेला परेपछि प्रहरीमा दिएको निवेदनअनुसार फेला पार्ने मान्छेसहित जानकारी गराउन जाँदा जिल्ला प्रहरी कार्यालय दैलेखमा रेग्मी पुगेका थिए ।
रेग्मीले चार महिनाअघि घर अगाडिबाट हराएको मोबाइल खोजीपाऊँ भनेर प्रहरीमा निवेदन दिएको र प्रहरीले चासो नदेखाएपछि आफैँ विभिन्न माध्यमबाट फेला पारेका थिए ।
रेग्मीले भने, ‘हराएको मोबाइल खोजीपाऊँ भनेर प्रहरीमा दिएको निवेदनको सुनुवाइ त भएन् भएन् उल्टै प्रहरीका उच्चपदमा रहेका व्यक्तिबाट दुर्व्यवहार सहनुपर्यो ।’
