काठमाडौँ- नेपाली काँग्रेसका वरिष्ठ नेता रामचन्द्र पौडेलले वर्तमान समयमा गठबन्धनविरुद्ध जानु काँग्रेसका लागि हितकर नहुने बताएका छन् ।
नेपाली कांग्रेस तनहुँ क्षेत्र नम्बर १ ले हिजो दमौलीमा आयोजना गरेको अन्तरक्रिया कार्यक्रममा वरिष्ठ नेता पौडेलले काँग्रेसले एक्लै लड्ने आत्मविश्वास भने राख्नुपर्ने बताए ।
“कांग्रेस एक्लै लड्छौँ भनेर मात्र हुँदैन, कम्युनिष्ट एकता कायम गराउन बाध्य पार्नुहुँदैन”, उनले भने , “एक्लै लड्ने आत्मविश्वास भने राख्नुपर्छ ।” कांग्रेस विगतमा पनि एक्लै लडेको चर्चा गर्दै उनले परिस्थितिअनुसार अगाडि बढ्नु अहिलेको आवश्यकता रहेको बताए । “समावेशीताका कारण एउटै पार्टीको बहुमत आउने अवस्था छैन, तालमेल गरेर काँग्रेसलाई ठूलो पार्टी बनाउनुपर्छ’’, उनको भनाइ थियो ।
कांग्रेस केन्द्रीय सदस्य शङ्कर भण्डारीले देशभर भएका विकासको काम काँग्रेसले गरेको बताउँदै जनतालाई यसबारेमा बुझाउन आवश्यक रहेको बताए । भएका गल्ती कमजोरी सुधार्दै अगाडि बढ्नुपर्ने बताउँदै उनले काङ्ग्रेसभित्र हातेमालो र हार्दिकता सिर्जना गर्नुपर्ने जोड दिए ।
चुनाव जित्ने नाममा गठबन्धन गर्न आवश्यक नरहेको भन्दै उनले काँग्रेसले एक्लै चुनाव जित्ने दाबी गरे । केन्द्रीय सदस्य प्रदीप पौडेलले कांग्रेस एक आपसमा मिले मात्र निर्वाचन जित्न सकिने बताएका छन् ।
क्षेत्रीय सभापति श्याम मौरातीको अध्यक्षतामा सम्पन्न कार्यक्रममा केन्द्रीय सदस्य द्वय गोविन्द भट्टराई, ध्रुव वाग्ले, निवर्तमान जिल्ला सभापति वैकुण्ठ न्यौपानेलगायतले बोलेका थिए ।
