सल्यान- सल्यानमा गत आर्थिक वर्षको तुलनामा ३३ प्रतिशतले सुन्तलाको उत्पादन घटेको छ ।
सिट्रस ग्रिनिङ्ग र सिट्रससिल्ला रोगका कारण सुन्तलाको उत्पादन घटेको कृषि विकास कार्यालय सल्यानले बताएको छ ।
कार्यालयका अनुसार गत आर्थिक वर्ष ७ हजार ४ सय ८३ मेट्रिकटन सुन्तला उत्पादन भएकोमा यस वर्ष ६ हजार ८ सय ८५ मेट्रिकटन मात्र उत्पादन भएको बताएको छ ।
गत वर्षभन्दा यस वर्ष ५ सय ९८ मेटिक्ट्रन सुन्तला कम उत्पादन भएको कृषि विकास कार्यालय सल्यानका सूचना अधिकारी भरत कुमार बस्नेतले जानकारी दिए ।
जिल्लामा ९ सय किसानले १ हजार ५ सय हेक्टरभन्दा बढीमा व्यावसायिक सुन्तला खेती हुँदै आइरहेको छ । सुन्तलाको क्षेत्रफल बढिरहे पनि रोगका कारण उत्पादन भने घटिरहेको उनको भनाई छ ।
जरा कुहिने, हाँगा पहिलो हुँदै जाने, फल पनि राम्रो नहुने भएका कारण विगत दुई तीन वर्षदेखि सुन्तलाको उत्पादन घट्दै जान थालेको कृषक भरतनाथ योगीले बताए।
विगतमा वर्षहरूमा वार्षिक २५ लाखभन्दा बढीको सुन्तला उत्पादन भएता पनि दुई वर्षदेखि उत्पादन निकै कम हुँदै आइरहेको योगीको भनाई छ ।
सिट्रस ग्रिनिङ्ग र सिट्रससिल्ला रोगका कारण वर्षेनी सुन्तलाको उत्पादनमा कमी आउन थालेको कृषि विकास कार्यालय सल्यानका प्रमुख भरत बस्नेतले बताए ।
यस प्रकारको समस्या सल्यानको मात्र नभएर देशभर भएको र यस रोगको निराकरणको उपाय पनि नभएको उनको भनाई रहेको छ ।
