हुम्ला- हुम्लाको मध्य भेगमा रहेको सर्केगाड गाउँपालिकाअन्तर्गत फुचा गाउँमा रहेको नीलकण्ठ आधारभूत विद्यालयको अवस्था दयनीय भएको छ । झट्ट हेर्दा विद्यालयको जस्तापाता पानी चुहिने छन् भने कक्षाकोठाभित्र बसेर पढ्न नसकिने अवस्था रहेको छ । विद्यार्थी अहिले खाली चौरमा बसेर पढ्न बाध्य छन् । विद्यालयको भवन अति नै जीर्ण भएका कारण १६४ भन्दाबढी विद्यार्थीलाई खुला चौरमा राखेर पढाउन बाध्य भएको विद्यालयका प्रधानध्यापक ओमप्रसाद जैसीले बताएका छन् ।
सर्केगाड–८ फुचा गाउँमा ८० घरधुरीका परिवार बसोबास गर्दै आएका छन् । गाउँका बालबालिकाले अध्ययन गर्ने विद्यालय श्री नीलकण्ठ आधारभूत विद्यालय हो जहाँ करिब १६४ जना छात्रछात्रा अध्ययनरत रहेका छन् । विद्यालयमा बालविकास केन्द्रदेखि कक्षा ८ सम्म पढाई सञ्चालन हुँदै आएको छ ।
हुम्ला उच्च हिमाली जिल्ला भएका कारण अत्यधिक वर्षा र हिउँदको समयमा बाक्लो हिउँ पर्ने गर्दछ । यस्तैमा स्कूलका कतिपय छतका जस्तापाता हिउँ र चीसोका कारण जीर्ण बनेर प्वाल नै परेका छन् । त्यही समयमा स्कूल नै बन्द गर्नुपर्ने अवस्था पनि आउने गर्दछ । हिमपात र पानी परिरहेका समयमा कक्षाकोठा भित्र पानी पसेर पढाउने अवस्था नभएको प्रधानध्यापक जैसीले बतााए ।
जीर्ण रहेको विद्यालय मर्मतका लागि सम्बन्धित सरोकारवाला र स्थानीय सरकारलाई पटकपटक जानकारी गराउँदा पनि कुनै सुनुवाइ नभएका कारण अवस्था दयनीय बन्दै गइरहेको प्रधानाध्यापक जैसीले गुनासो गरेमका छन् ।
विद्यालयका चार भवनमध्ये दुई भवनका चार कोठामात्र राम्रो भएको र बाँकी सबै जीर्ण अवस्थामा छन् । जस्तापातामा पुरै खिया लागेर प्वाल परेको हुनाले घामपानी छेक्न नसक्ने भएकाले कारण विद्यार्थीलाई चौरमै राखेर पढाउनुपर्ने बाध्यता रहेको विद्यालय व्यवस्थापन समितिका अध्यक्ष धनवीर बुढाले बताए।
विद्यालयको प्राङ्गणमा बालबालिकाले प्रयोग गर्ने चर्पीलगायत खानेपानीको धारासमेत नभएका कारण विद्यालय वरिपरि फोहर थुप्रिएको छ । त्यसका कारण विद्यार्थीले राम्रो शिक्षा पाउनुको साटो उनीहरुमा रोग फैलने खतरासमेत उब्जेको छ । दैनिक सबैभन्दा बढी आवश्यकपर्ने खोनपानीको थप समस्या भएको यहाँका विद्यार्थीलेसमेत गुनासो गरेका छन् ।
अझ विद्यार्थीले विद्यालय पोशाक पनि लगाउन पाएका थिएनन् । कुनै सरोकारवालाको पनि ध्यान केन्द्रित नभएपछि, विद्यालय आफैँले स्र्रोत जुटाइ बाँकी शिक्षक, शिक्षिकाको तलबबाट केही प्रतिशत कटाइ करिब १६४ विद्यार्र्थीमध्ये १३३ छात्रछात्रालाई ट्र्याकसुट वितरण गरिएको प्रधानाध्यापक जैसीले बताए ।
