कञ्चनपुर । कञ्चनपुरमा एमसीसी अनुमोदनको विरोधमा उत्रिएका नेत्र विक्रम चन्द ‘विप्लव’ निकट नेपाल कम्युनिस्ट पार्टीका कार्यकर्ता र प्रहरी बिच झडप भएको छ । महेन्द्रनगरमा झडपको क्रममा प्रहरीको लाठी चार्जबाट २ जना घाइते भएका छन् ।
विप्लव निकट युवा सङ्गठन कञ्चनपुरका उपाध्यक्ष दीपेन्द्र ऐरी र अखिल क्रान्तिकारी कञ्चनपुरका सचिव हरिष ऐरी घाइते भएको अखिल क्रान्तिकारीका केन्द्रीय सचिव वीरेन्द्र शाहले जानकारी दिएका छन् । उनका अनुसार घाइतेहरूको महाकाली अस्पतालमा उपचार भइरहेको छ ।
शान्तिपूर्ण आन्दोलनमा प्रहरीले दमन गरेको उनले बताए। ‘विप्लव’ नेतृत्वको नेपाल कम्युनिष्ट पार्टीसहित ६ दल र दुई मोर्चाले आज नेपाल बन्द गरेका छन् ।
विप्लव नेतृत्वको नेकपा, मोहन वैद्य नेतृत्वको नेकपा (क्रान्तिकारी माओवादी), ऋषि कटेल नेतृत्वको नेकपा, आहुती नेतृत्वको वैज्ञानिक समाजवादी कम्युनिष्ट पार्टी नेपाल, कर्णजीत नेतृत्वको नेकपा माओवादी केन्द्र समाजवादी र सिपी गजुरेल नेतृत्वको देशभक्त जनगणतान्त्रिक मोर्चाले एमसिसी खारेजीको माग राखेका छन् ।
