रुकुम- रुकुम पश्चिमको कारागारमा क्षमताभन्दा बढी कैदीबन्दी रहेका छन् । २५ जनाको क्षमता रहेको रुकुम पश्चिमको कारगारमा रुकुम पूर्व र रुकुम पश्चिमका १२५ जना कैदबन्दी तथा थुनुवा रहेको जिल्ला कारागार शाखा रुकुम पश्चिमले जानकारी दिएको छ, जसमध्ये पुरुष ११५ जना, महिला आठजना र आश्रित नाबालक दुईजना रहेको जिल्ला कारागार शाखाले बताएको छ ।
कारागारको क्षमताभन्दा बन्दी धेरै हुँदा एउटै कोठामा १०–१५ जना सुत्नुपर्ने समस्या रहेको निमित्त कार्यालय प्रमुख अविर घर्तीले जानकारी दिए । ‘कैदीबन्दी धेरै हुँदा खाने, बस्ने, सुत्ने र शौचायलको समेत समस्या हुने गरेको छ,’ घर्तीले बताए ।
संघीय संरचना अनुसार रुकुम दुई जिल्लामा विभाजन भए पनि रुकुम पूर्वमा जिल्ला कारागार शाखाको स्थापना नहुँदा समेत दुई जिल्लाका कैदीबन्दी एकै जिल्लामा राख्नुपरेको हो । रुकुमपूर्व र रुकुम पश्चिम ७६ पुरुष र तीन महिला थुनुवा छन् । जिल्ला कारागार रुकुम पश्चिममा ३९ पुरुष र पाँचजना महिला कैदीबन्दी छन् । कर्तव्य ज्यानतर्फ सबैभन्दा बढी सात कैदीबन्दी र २८ जना थुनुवा गरी जम्मा ३५ जना छन्, जसमध्ये महिला चार र पुरुष ३१ जना रहेको कार्यालयले जानकारी दिएको छ ।
