भेरी नदीमा बेपत्ता भएका तीन बालबालिकाको अवस्था अझै अज्ञात

राष्ट्रिय संञ्चार

२९ फाल्गुन २०७८, आईतवार १२:०८ प्रकाशित

सुर्खेत- सुर्खेत भेरी नदीमा नुहाउने क्रममा हिजो देखि बेपत्ता भएका तीन जना बालबालिकाको अवस्था अझै पत्ता लागेको छैन । नदीमा बालबालिका हराएदेखि नै खोजी भइरहेको तर अहिलेसम्म नभेटिएका जिल्ला प्रहरी कार्यालय सुर्खेतले बताएको छ ।

उनीहरु हिजो बेलुका ५ बजेतिर भेरीगङ्गा नगरपालिका वडा नम्बर ११ रामघाटमा रहेको भेरी नदीमा नुहाउने क्रममा दुई जना बालिका र एक जना बालक बेपत्ता भएका थिए ।

बेपत्ता हुनेमा भेरीगङ्गा नगरपालिका वडा नम्बर १३ का १२ वर्षकी गङ्गा खड्का, १२ वर्षकी कृष्णा सिञ्जाली र लेकवेशी नगरपालिका ५ का ८ वर्षका दिनेश बुढा रहेका जिल्ला प्रहरी कार्यालय सुर्खेतका प्रवक्ता डीएसपी रामप्रसाद घर्तीले जानकारी दिएका छन् ।