दाङ – दाङमा डढेलो नियन्त्रणका लागि वनबाट पात पतिङ्गर सङ्कलन गरी कम्पोस्ट मल बनाउन सुरु गरिएको छ । डिभिजन वन कार्यालय दाङले डढेलो जोखिम क्षेत्रको पहिचान गरी आठ ठाउँमा कम्पोस्ट मल बनाउन सुरु गरेको हो ।
वनमा रुखबाट झर्ने पातपतिङ्गर, स्याउला र सुक्खा घाँसका कारण बर्सेनि वनमा डढेलोको घटना बढेको भन्दै वन डढेलो नियन्त्रण र स्थानीय किसानको उत्पादनमा सहयोग गर्नका लागि कम्पोस्ट मल बनाउने काम थालिएको डिभिजन वन कार्यालय दाङका सूचना अधिकारी खिमबहादुर केसीले जानकारी दिए।
वनमा खेरा गइरहेको वस्तु सङ्कलन गरी उत्पादन हुने प्राङ्गारिक मल स्थानीयलाई दिइने र यो मलबाट किसानले आफ्नो उत्पादन बढाउन सक्ने सूचना अधिकारी केसीको भनाइ रहेको छ ।
वनमा डढेलो लगाउनु हुँदैन भन्ने चेतनाको अभाव तथा वनमा डढेलो लगाउनेको पहिचान गरी कारबाही गर्न नसक्दा डढेलो लाग्ने गरेको डिभिजन वन कार्यालय दाङका प्रमुख मोहन श्रेष्ठले जानकारी दिएका छन् ।
दाङका ८३ सामुदायिक वन डढेलोको उच्च जोखिममा रहेका छन् । चुरे क्षेत्रमा रहेका सामुदायिक वन डढेलोको उच्च जोखिममा रहेको डिभिजन वन कार्यालय दाङले जानकारी दिएको छ । पछिल्लो नौ वर्षमा दाङको ६ सय १४ ठाउँमा डढेलो लाग्दा झण्डै ४३ हजार वन क्षेत्रमा क्षति पुगेको डिभिजन वन कार्यालय दाङको तथ्याङ्क रहेको छ ।
