सुर्खेत -कर्णाली प्रदेश सभाको पाँच वर्षे कार्यकाल सकिनै लाग्दा भोली दशौँ अधिवेशन अन्त्य हुने भएको छ ।
सभामुख राजबहादुर शाहीले सदन अन्त्यका लागि भोली प्रदेस प्रमुखलाई सिफारिस गर्ने भन्दै केहिदिनमै औपचारिक कार्यक्रम गरेर सांसदलाइ विदाइ गर्ने जानकारी दिए ।
पहिलो कार्यकालको अन्तिम अधिवेशनका रुपमा रहेको दशौँ अधिवेशन गत जेठ १० गते सुरु भएको हो ।
समानुपातिकको वन्द सूचि निर्वाचन आयोगमा असोज दुई गते बुझाउने भएका कारण असोज एक गते राति देखि नै सदनको पदावधी समाप्त हुन्छ ।
कर्णाली प्रदेश सभाले आफ्नो पाँच वर्षे कार्यकालमा आठ वटा अध्यादेश सहित ७८ वटा विधेयक दर्ता गरेपनि ४४ वटा विधेयक प्रमाणीकरण भएको प्रदेश सभा सचिवालयले जनाएको छ ।
प्रदेश सभाबाट निर्णय भइ संंशोधनकालागि ११ विधेयक विषयगत समितिमा पठाइएको छ भने प्रदेश सभामा दर्ता भइ टेबुल हुन बाँकी विधेयक ६ वटा रहेकाछन् ।
प्रदेश सभामा टेबुल भइ कारबाही अघि बढ्न नसकेका विधेयक एउटा रहेको छ भने ८ वटा विधेयक फिर्ता भएको सचिवालयले जनाएको छ ।
२०७४ साल माघ २१ गते पहिलो बैठक बसेको कर्णाली प्रदेश सभामा ४० जना सदस्य रहने व्यवस्था भएपनि अहिले ३५ जना सदस्य रहेकाछन् ।
