सुर्खेत- सुर्खेत निर्वाचन क्षेत्र नं. १ बाट विजयी नेपाली कांग्रेसका उपसभापति पूर्णबहादुर खड्का २०३१ सालदेखि राजनीतिमा सक्रिय हुदै आएका छन् । राजनीतिमा सक्रिय भएपछि २०३२ सालदेखि नै उनले पटकपटक बन्दी जीवन बिताउनु परेको थियो ।
विद्यार्थी जीवनदेखि नै राजनीतिमा सक्रिय खड्काले नेपाल विद्यार्थी सङ्घको केन्द्रीय सदस्य र केन्द्रीय उपाध्यक्ष भएर काम समेत गरेका छन् । कांग्रेसको सुर्खेत सभापति भएर २०४५ सालदेखि २०४९ सम्म उनले सङ्गठन बिस्तारको काम गरे । खड्का २०४८, २०५१ र २०५६ सालमा पनि सोही क्षेत्रबाट सांसद निर्वाचित भएका थिए ।
विसं २०६४ को पहिलो संविधानसभा निर्वाचनमा भने उनले समानुपातिक सूचीमा समावेश भएका थिए । संविधानसभाको दोस्रो निर्वाचन, २०७० मा निर्वाचित खड्का २०७४ सालको आम निर्वाचनमा भने पराजित भएका थिए ।
यस क्रममा उनले राज्य व्यवस्था समितिको सभापति, युवा, खेलकुद तथा संस्कृतिमन्त्री, वाणिज्य मन्त्री, जनसङ्ख्या तथा वातावरणमन्त्री, सूचना तथा सञ्चार मन्त्री, उद्योग मन्त्री, गृह मन्त्री र उद्योग, वाणिज्य तथा आपूर्तिमन्त्री भएर काम गारेको अनुभव खड्का संग रहेको छ ।
विसं २०१२ फागुन १७ गते सुर्खेतको पाम्कामा बुबा प्रेमबहादुर खड्का र आमा मायादेवी खड्काको सुपुत्रका रुपमा उनको जन्म भएको थियो । खड्काले अष्टे«लिया, अष्ट्रिया, बङ्गलादेश, बेल्जियम, चीन, हङकङ, भारत, जापान, केन्या, लक्जम्बर्ग, नेदरल्याण्ड, कतार, सिङ्गापुर, श्रीलङ्का, स्वीट्जरल्याण्ड, थाइल्याण्ड, बेलायत र अमेरिकाको भ्रमण गरेका छन् ।
खड्का कांग्रेसको गत वर्ष सम्पन्न महाधिवेशनबाट उपसभापति पदमा निर्वाचित भएका हुन् । यसअघि उनले पार्टीको महामन्त्री र सहमहामन्त्री भएर काम गरिसकेका छन् ।
खड्का सुर्खेत क्षेत्र नं. १ बाट ४२ हजार छ सय सात मत प्राप्त गरी विजय भएका छन् । उनले नेकपा (एमाले) का ध्रुवबहादुर शाहीलाई ११ हजार छ सय १९ को मतान्तरले पराजित गर्नुरे । शाहीले ३० हजार नौ सय ८८ मत प्राप्त गरेका थिए ।
