वीरेन्द्रनगर नगरपालिकाका मानव अधिकार रक्षक संजालहरुले बादी सरोकार मञ्चद्धारा संरक्षण गर्दै आएका बालबालिकाहरुलाई खाद्यन्न सहयोग गरेका छन् । वीरेन्द्रनगर नगरपालिकाका मानव अधिकार सम्वन्धी बिभिन्न सवालहरुको उजागर गर्ने र समाधानमा सहकार्य गर्ने उद्देश्यले इन्सेकद्धारा निर्माण गरिएका नमुना कर्णाली मानव अधिकार रक्षक संजाल र वीरेन्द्रनगर मानव अधिकार संजालहरुले बादी सरोकार मञ्चमा रहेका बिपन्न तथा सिमान्तकृत बादी समुदायका बालबालिकाहरुका लागी संयुक्त रुपमा छोटो बैंठकको आयोजना गरि करिव बीस हजार बराबरको खाद्यन्न सहयोग गरेको हो ।
कर्णालीको राजधानी वीरेन्द्रनगर शहरमा बादी समुदायको अधिकारको लागी निरन्तर संघर्ष गर्दै आएको बादी सरोकार मञ्चका अध्यक्ष हिक्मत बादीले मानव अधिकार रक्षकसंजालले गरेको यो सहयोगले मञ्च परिवार र बालबालिकालाई ठुलो प्रोत्साहन पुगेको र भविष्यमा पनि सहयोग र सहकार्यको अपेक्षा गरेको बताउनु भयो ।
इन्सेकका कार्यक्रम संयोजक किरण पौडेलले सिमान्तकृत वादी समुदायका करिव १२० जना (५३ बालक, ६७ बालिका) बालबालिकाको संरक्षणको साथ साथै शिक्षाको अधिकारको पनि हेरचाह गर्दै आएको बादी सरोकार मञ्चको काम आफैमा चुनौतीपुर्ण र सहासपुर्ण रहेको र सरकारले यसको उचित व्यवस्थापनको लागी यथासिघ्र पाईला चाल्नु पर्ने कुरा बताउनु भयो ।
खाद्यन्न हस्तान्तरण गर्दै वीरेन्द्रनगर मानव अधिकार रक्षक संजालका संयोजक सुनिल काजी गौतमले वादी समुदायका सिमान्तकृत बालबालिकालाई यसरी सहयोग गर्न पाउदा खुसी लागेको र सम्वन्धीत निकायको ध्यानाकर्षणको लागी पनि थप सहकार्य र समन्वय गर्ने कुरा बताउनु भयो । त्यसैगरी, नमुना कर्णाली मानव अधिकार रक्षक संजालकी सह–संयोजक मालती बि.क.ले पनि खाद्यन्न हस्तान्तरण गर्दै वादी सरोकार मञ्चमा रहेका सम्र्पण बालबालिकाहरुलाई पढाईमा बिशेष ध्यान दिन हुन आग्रह गर्नुको साथै निरन्तर रुपमा समन्वय र सहकार्यको लागी तत्पर रहेको करा व्यक्त गर्नु भयो ।
